भांगरभूंय | प्रतिनिधी
मडगांव, प्रतिनिधी : मडगांव ते वांद्रें रेल्वे गाडी हालींच कोंकण रेल्वे मार्गार सुरु केली. मडगांव रेल्वे स्टेशनावेल्यान पयली मडगांव ते वांद्रे रेल्वे गाडी मंगळारच्यान सुरू जाली. मंत्री आलेक्स सिक्वेरा हांचे सयत आमदार दिगंबर कामत, रेल्वे अधिकारी हाचे हाजेरींत हे गाडयेक पांचवो बावटो दाखयलो. हे गाडयेक लागून पश्चीम रेल्वेक कोकण रेल्वे जोडिल्ल्यान प्रवाशांची वेवस्था जाल्ल्याचें कामत हांणी सांगलें.
कोंकण रेल्वे मार्गावेल्यान पश्चीम रेल्वेक वचपी एकूय गाडी आतां मेरेन नाशिल्ली. पश्चीम रेल्वेच्या वरवीं कोंकण रेल्वे मार्गार पयली मडगांव ते वांद्रें ही रेल्वे आयच्यान नेमान सुरू जाली. हे कार्यावळी वेळार मंत्री आलेक्स सिक्वेरा, आमदार कामत, आमदार उल्हास तुयेंकार, नगराध्यक्ष दामोदर शिरोडकार, कोकण रेल्वेचे वरीश्ठ जनसंपर्क अधिकारी बबन घाटगे हांचे सयत हेर वांगडी हाजीर आशिल्ले.
घाटगे हांणी, गोंयच्यान पश्चीम मार्गाक जोडपी ही पयली रेल्वे. मडगांव रेल्वे स्टेशनावेल्यान सकाळीं ७.४० वरांचेर ही गाडी सुट्टली आनी त्याच दिसा वांद्रें हांगा पावतली.
दर सप्तकांत मंगळार आनी बिरेस्तारा ही गाडी मडगांवच्यान, जाल्यार दर बुधवार आनी शुक्रारा वांद्रें हांगच्यान सुट्टली. मडगांव सोडून करमळी आनी थिये स्टेशनांचेर ही गाडी थांरतली हेंय स्पश्ट केलें. कोकण रेल्वे मार्गार सध्यातरी आनीक नवी गाडी धांवची ना. मात गणेशोत्सवा निमतान प्रवाशांची वेस्था जावचे खातीर विशेश गाडयो सोडटात अशें घाटगे हांणी सांगलें.
आमदार कामत हांणी, पश्चीम रेल्वेक जोडपी रेल्वे गाडी कोकण रेल्वे मार्गा वेल्यान सुरू जाल्ल्यान प्रवाशांची वेवस्था जाल्या. प्रधानमंत्री नरेंद्र मोदी आनी रेल्वमंत्री अश्विन वैष्णव हे रेल्वेचे सुधारणे कडेन लक्ष दितात. प्रवाशांक चडांत चड सुविधायो मेळच्यो हे खातीर राज्य सरकार आनी केंद्र सरकार सगळे तरेचे यत्न करता अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
