भांगरभूंय | प्रतिनिधी
मडगांव, प्रतिनिधी ः मडगांव रेल्वे स्टेशनाच्या प्लॅटफॉर्म नंबर स चेर मिथुन राज के. के. हाका लुटलो. ते उपरांत एटीएमांतल्यान जबरदस्तीन पयशे काडपाक लायले. कागाळी उपरांत कोंकण रेल्वे पुलिसांनी अनवळखी मनशा आड गुन्यांव नोंद करून तपास सुरू केला.
मडगांव रेल्वे स्टेशन वाठारांत राज्या भायल्यान आयिल्ले बरेच लोक रावतात. हाका लागून आतां प्रवाशांक त्रास जातात आनी प्लॅटफॉर्माचेर कोणूच ना हें पळोवन रातच्या वेळार लुटपाचे प्रकार घडतात. 25 मे दिसा रातच्या सुमार 11 वरांचेर ही चोरीची घडणूक घडली. कागाळदार मिथुन राज के. के. (33, केरळ) मडगांव रेल्वे स्टेशनांतल्यान स्वामी विवेकानंद रेल्वे हॉलिडे होमांत वतालो. 6 नंबराच्या प्लॅटफॉर्मावयल्यान वतना 20 ते 30 वर्सां पिरायेच्या गटांतल्या चार तरणाट्यांनी प्लॅटफॉर्माचेर कोणूच नाशिल्ल्याचो फायदो घेवन ताका आडायले. ताणें मिथुना कडेन पयशे मागले. ताणें दिवपाक न्हयकार दिल्ल्यान ताका बडयलो आनी ताच्या पाकिटांतल्यान एक हजार रुपया आनी रेल्वे इमर्जन्सी पास जबरदस्तीन काडून घेतलो. ते उपरांत मिथुनाक बँक ऑफ इंडिया एटीएमांत व्हरून ताका 5 हजार रुपया काडपाक लायले आनी बॅगांतले 650 रुपया काडून घेतले.
वयल्या प्रकारा उपरांत मिथुन राज के. के. हांणी कागाळ दाखल केली. हे कागाळी उपरांत कोंकण रेल्वे पुलिसांनी अनवळखी चार जाणांचेर गुन्यांव नोंद केला. पुलीस निरिक्षक सुनील गुडलर हांचे वांगडा कोंकण रेल्वे पुलीस ह्या प्रकरणाची चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
