भांगरभूंय | प्रतिनिधी
मडगांव, प्रतिनिधी : मडगांव रेल्वे स्टेशनाच्या वाठारांत मुरुगुराज दिनेश हाका पुलिसांनी अटक करून ताचे कडल्यान ३ किलो गांजो जप्त केलो. कोकण रेल्वे पुलीस आनी मडगांव रेल्वे सुरक्षा दळान जोड पालवान ही कारवाय करून दुबावीताक अटक केली.
मेळिल्ले म्हायती प्रमाण, मडगांव रेल्वेस्टेशन वाठारांत दुबावीत तरेन भोंवपी एका तरणाट्याक मडगाव रेल्वे सुरक्षा दळाच्या कर्मचार्यांनी आडावन ताची चवकशी केली. त्या तरणाट्यान प्रस्नांच्यो जापो सारक्यो दिवंक नाशिल्ल्यान पुलिसांक ताचेर दुबाव आयलो. उपरांत दुबाविताक रेल्वे सुरक्षा दळान फुडले तपासणे खातीर कोकण रेल्वे पुलिसां कडेन सोबयलो. पुलिसांनी जेन्ना ताची चवकशी केली तेन्ना तांणी घुंवळे वखदां आशिल्ल्याचें सांगलें. कोकण रेल्वे पुलिसांनी दुबाविता कडल्यान ३ लाखांचो ३ किलो गांजो जप्त केलो. दुबाविताचेर गुन्यांव नोंद करून अटक केली.
ही कारवाय कोकण रेल्वे पुलीस निरीक्षक सुनील गुडलर आनी रेल्वे सुरक्षा दळाचे पुलीस निरीक्षक विनोद मिश्रा हांच्या मार्गदर्शना खाला जाली. हे कारवायेंत रेल्वे सुरक्षा दळाचे उपनिरीक्षक लखन सिंग, पुलीस कॉन्स्टेबल प्रवेश कुमार आनी विक्रमजीत हांचो आसपाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
