भांगरभूंय | प्रतिनिधी
कार्यरत विभाग दुसरे सुवातेर स्थलांतरीत
मडगांव, प्रतिनिधी : मडगाव भलायकी केंद्र कार्यरत आशिल्ले इमारतीचो एक भाग कांय म्हयन्यां पयलीं कोसळिल्लो. उपरांत आदल्या हॉस्पिसिओच्या इमारतींत केंद्र व्हेल्लें. आतां तेय इमारतीचो कांय भाग कोसळ्ळ्या उपरांत भलायकी केंद्र त्याच वाठारांतले दुसरे इमारतींत स्थलांतरीत केलें. भलायकी केंद्रा खातीर बर्या इमारतीची वेवस्था करची वा आदली इमारत बेगीनूच दुरुस्त करपाची मागणी शॅडो कौन्सिला वतीन केली.
मडगांव शारांतल्या भलायकी केंद्राचे इमारतीचो कांय भाग रातचो कोसळ्ळ्या उपरांत भलायकी विभागान ही इमारत खाली केली. दक्षीण गोंय जिल्हो हॉस्पिटल नव्या जाग्यार गेल्ल्यान रितें आशिल्ले आदल्या हॉस्पिसिओचे इमारतींत भलायकी केंद्राचें कामकाज सुरु केल्लें. आता हॉस्पिसिओचे जे इमारतींत भलायकी केंद्राची ओपीडी आनी हेर काम चलतालें ते इमारतीच्या स्लॅबाचो कांय भाग कोसळ्ळो. हो भाग जनेलाचेर पडिल्ल्यान वयली पारपेट कोसळ्ळी. हातूंत कोणाकूच कांय जावंक ना. ताका लागून ओपीडी विभाग आनी हेर विभाग हॉस्पिसिओचे आदले इमारतीच्या वाठारांत फा. मिरांडा हांच्या नांवान वळखपी वाठारांत स्थलांतरीत केल्या.
शॅडो काव्नसील फॉर मडगांवचे संयोजक साविओ कुतिन्हो हांणी, राष्ट्रीय खेळां सर्ती वेळार निविदा काडिनासतना १० कोटींची उदरगतीचीं कामां केल्यांत मात भलायकी केंद्राची इमारत दुरुस्ती करपा खातीर १४ लाखांचो खर्च करप सरकाराक कित्याक कठीण वता? असो प्रस्न तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
