भांगरभूंय | प्रतिनिधी
नागरिकांच्यो मंत्री दिगंबर कामत हांचे कडेन कागाळी
मडगांव : मडगांव पालिकेंतल्यो कांय फायली शेणटात अश्यो कागाळी नागरिकांनी मंत्री दिगंबर कामत हांचे कडेन केल्या. उपरांत मंत्री दिगंबर कामत हांणी पालिकेंतली फायल शेणिल्ल्याचें समजले उपरांत पुलिशेंत २४ वरांनी कागाळ दाखल करात अशे निर्देश पालिका प्रशासकांक दिले.
भौशीक बांधकाम मंत्री दिगंबर कामत हांणी पालिका सभाघरांत जनते कडेन संवाद सादलो. ह्या वेळार पालिका मुख्याधिकारी मधु नार्वेंकार, पालिका प्रशासक श्रीनेत कोठावळे हांचे सयत पालिकेंतले अभियंता आनी हेर कर्मचारी आशिल्ले.
ह्या वेळार मडगांव पालिका वाठारांतल्या नागरिकांनी आपल्यो समस्या मंत्र्यांकडेन मांडल्यो. हातुंतल्यो ज्यो समस्या पालिकेच्या अधिकारांत सोडोवं येताल्यो ताचेरबेगोबेग निर्णय घेवपाचे निर्देश मंत्री कामत हांणी मुख्याधिकारी आनी प्रशासकांक दिले.
मंत्री कामत हांणी सांगलें, पालिकेंतल्या कामां विशीं खुबश्या लोकांक काम करपा खतीर आयले उपरांत सेगीत पासयो मारच्यो पडटात आनी काम पुराय जावचे खातीर कळाव जाता अश्यो कागाळी केल्यात.
उपरांत प्रशासकांक ह्या विशयांत वयक्तीक लक्ष घालपाक सांगलें. लोकांचीं कामां बेगोबेग जावप गरजेचें आसा. हाका लागून तांकां पासयो मारच्यो पडच्यो न्हय. नांवान बदल करपाचें काम आसल्यार कांय प्रमाणपत्रांवेलें नांव बदलपाचें आसल्यार, अशीं कामां सगलीं गरजेचीं कागदपत्रां दिले उपरांत दोन दिसांनी जावपाची गरज आसा.
नागरिकांची कामां ‘ऑन द स्पॉट’ जावचीं म्हणून मडगांव पालिकेंत नागरिकांच्यो समस्या जाणून घेतल्यात. एका प्रकरणांत, घोवान ‘पॉवर ऑफ ऍटर्नी’ बायलेक दिल्ल्यान तिच्या तीन चलयांनीय आवयकूच हक्क दिल्यात. अशें आसतनाय तिणें जे चलयेच्या नांवार फ्लॅट करपाक सांगला, तिच्या नांवार तो जायना. हाका लागून पालिकेंतले कर्मचारी वेगवेगळीं कागदपत्रां हाडपाक लायतात, सेगीत पासयो मारपाक लायता अशी कागाळ आयली. ह्या प्रकरणांत आवयन सांगिल्ले चलयेच्या नांवार फ्लॅट करपाचे निर्देश दिल्यात.
कांय नागरिकांनी कामा खातीर आयले उपरांत फायल्स शेणिल्ल्याचें सांगतात. हे विशीं पालिकेच्या प्रशासकाक पुलीस कागाळ दाखल करपाचे स्पश्ट निर्देश दिल्यात. फायल शेणिल्ल्याचें लक्षांत आयले उपरांत ह्या कर्मचार्याक फायल्स सोदपा खातीर २४ वरां दिवचीं. तितल्या वेळान फायल्स मेळ्ळो नात जाल्यार पुलिशेंत कागाळ करपाक सांगलें. डाटा ऑपरेटर, एलडीसी आनी हेर कर्मचार्यांची भरती केले उपरांतूय पालिकेंत कर्मचारी उणे आशिल्ल्याचेंय मंत्री कामत हांणी सांगलें.
कालकोंडाच्या दैवज्ञ भवना लागसारचे खळयेंत ऍसिडाचो वास येता अशी कागाळ थळाव्यांनी केल्या. हाचेर मंत्री कामत हांणी, ह्यान पयलींय अश्यो कागाळी आयिल्ल्यो. भांगराच्यो वस्ती तयार करपी कारागीर तें उदक सोडटा आसत, अशी शक्यताय तांणी उक्तायली.
ह्या वेळार प्रदुशण खात्याच्या अधिकार्यां कडल्यान पळोवणी केल्ली. मात कितेंच मेळूंक ना. आतां रातच्या वेळार ऍसिडाचें उदक सोडटात अश्यो कागाळी आसात. ते प्रमाण गोंय प्रदूशण नियंत्रण मंडळाक पळोवणी करपाक सांगिल्ल्याचें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
