भांगरभूंय | प्रतिनिधी
जिनो क्रिकेट क्लबाक फायनलींत 5 विकेटींनी हारोवन मडगांव क्रिकेट क्लबान (एमसीसी) पणजी जिमखानान आयोजीत केल्ले बांदोडकार करंड टी-20 क्रिकेट सर्तीचें वस्तादपण जोडलें. वस्तादपण मेळोवपी एमसीसीक रोख 75 हजार आनी आकर्शक बांदोडकार करंड जाल्यार उप वस्ताद जिनो क्रिकेट क्लबाक रोख 40 हजार रुपया फावो जाले.
बांदोडकार क्रिकेट मैदानाचेर खेळयिल्ले हे लडतींत टॉस जिखून एमसीसीन जिनो क्रिकेट क्लबाक पयलीं बॅटींग करपाचें आमंत्रण दिलें. जिनो क्लबाचो डाव एमसीसीन 20 ओव्हरींनी 7 बाद 122 धांवड्यांचेर आडायलो. तांच्या आनंद तेंडुलकारान 43 बॉलांनी 4 चवके आनी तीन सक्यांचे मजतीन 60, पुखराज मानान 25 जाल्यार देव लाक्रान 15 धांवड्यो केल्यो. एमसीसी खातीर पी तपस्वीन 24 धांवड्यांनी 3, फॅलिक्स आलेमांवान 12 धांवड्यांनी 2 जाल्यार राहुल मेहता आनी यश कसवणकारान दरेकी 1 विकेट घेतली.
ते उपरांत एमसीसीन 14.2 ओव्हरींनी 5 बाद 123 धांवड्यो करून सहज जैत जोडलें. तांच्या पी तपस्वीन 23 बॉलांनी 4 चवके आनी 2 सक्यांचे मजतीन 41, समर दुभाषीन नाबाद 35 आनी सनथ नेवगीन 25 धांवड्यो केल्यो. जिनो क्लबा खातीर मुखेली दर्शन मिशाळान 19 धांवड्यो दिवन 3, जाल्यार मोहीत रेडकारान 30 धांवड्यांनी 2 विकेटी घेतल्यो.
जिनो क्रिकेट क्लबाच्या पुखराज मानची सर्तींतलो उत्कृश्ट बॅट्समन, एमसीसीच्या फॅलिक्स आलेमांवाची उत्कृश्ट बॉलर म्हणून जाल्यार पी तपस्वीची फायनलींतलो खेळगडो आनी सर्तींतलो खेळगडो पुरस्कारा खातीर निवड जाली.
इनामां भेटवण सुवाळ्याक मुखेल सोयरे म्हणून बांदोडकार ग्रुपाचे संचालक यतीन काकोडकार उपस्थीत आशिल्ले. ह्या वेळार डॉ. सागर साळगांवकार तशेंच एमसीसीचे सचीव अपुर्व भेंब्रे खाशेले आमंत्रीत म्हणून उपस्थीत आशिल्ले. पणजी जिमखानाचे प्रशांत काकोडेन सगल्यांक येवकार दिलो, सुत्रसंचालन आनी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
