भांगरभूंय | प्रतिनिधी
मडगांव, प्रतिनिधी : मडगाव पालिका उपनगराध्यक्षपदा खातीर सोमारा अर्ज सादर करपाचे मुजतींत नगरसेवक बबिता नायक हांचेच तीन अर्ज दाखल जाल्यात. हेर खंयच्याच नगरसेवकांनी अर्ज सादर करूंक नाशिल्ल्यान उपनगराध्यक्षपदार बबिता नायक हांची निवड निश्चीत जाल्या. मंगळार वेंचणुकेचो दीस आशिल्ल्यान ह्या वेळार ही घोशणा करतले.
मडगांव पालिकेंतल्या राजकी घडामोडी उपरांत दीपाली सावळ हांचो राजिनामो मंजुर केलो. उपरांत त्या पदा खातीर पालिका संचालक ब्रिजेश मणेरीकार हांणी नगरसेवकांक वेंचणुके विशीं पत्र धाडलें. वेंचणूक निर्वाचन अधिकारी म्हणून साश्टीचे उपजिल्होधिकारी रमेश गांवकार हांची नियुक्ती केली. सोमारा अर्ज सादर करपाचे मुजतींत मुख्याधिकारी गौरीश शंखवाळकार हांचे कडेन नगरसेवक बबिता नायक हांचेच तीन अर्ज सादर जाल्यात. हातूंत आदली उपनगराध्यक्ष दीपाली सांवळ, नगराध्यक्ष दामोदर शिरोडकार आनी नगरसेवक कामिल बर्रेटो अशा तिगांनी अनुमोदन दिल्ले तीन अर्ज आसात. अर्ज सादर करपाची मुजत सोंपल्या उपरांत बबिता नायक हिचेच अर्ज आयिल्ल्यान नायक हांची उपनगराध्यक्षपदार नेमणूक निश्चीत जाल्या. सध्या पालिकेंत भाजपप्रणित नगरसेवकांची सत्ता आशिल्ल्यान हो निर्णय सगळ्यां वतीन घेतिल्ल्याचें एका नगरसेवकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
