भांगरभूंय | प्रतिनिधी
मडगांव: मडगांव अर्बन को ऑपरेटीव्ह बँक लिमिटेडाचेर लिक्विडेटर नेमून ठेविदारांक पयशे दिवपाचें काम केलें. आतां मडगांव अर्बन बँकेच्या मडगांव, बाणावली आनी पणजी हांगासरली मालमत्ता जशी आसा तशे स्थितींत विक्रे विशीं नोटीस जारी केल्या. 19 जुलय मेरेन अर्ज सादर करपाची मुजत दिल्या.
मडगांव अर्बन बँकेचो परवानो रिझर्व्ह बँक ऑफ इंडियान 27 जुलय 2021 दिसा रद्द केल्लो. उपरांत बँकेचेर लिक्विडेटर म्हूण एस. व्ही. नायक हांची नेमणूक केल्ली. दोन वर्सां पयलीं मडगांव अर्बन बँकेच्या मडगांव, सांगें, ओल्ड मार्केट मडगांव, कुडटरी, बाणावली, पणजी, सांत आंद्रे, आकें अल्टो, फोंडें हांगासरले णव फांटे बंद केल्ले.
मडगांव अर्बन बँकेंतल्या सुमार धा हजारां परस चड ठेविदारांक आनी गुंतवणुकदारांक विहीत अटी प्रमाण तांचे पयशे परतून केल्यात. तशेंच अडेजशे परस चड लॉकर्सधारकांकूय नोटीस धाडून तांच्यो मोलादीक ठेवी व्हरपाक सांगिल्ल्यो.
आतां बँकेचे वेवस्थापकी संचालक किशोर आमोणकार हांचे कडल्यान मडगांवच्या रिलायन्स प्लाझांतली 169 चौमि सुवात, बाणावलेंतली कुरैया क्लासीक हांगासरली 261.30 चौमि सुवात आनी पणजे नावेलकार ट्रे सेंटरांतली 191.75 चौमि सुवात आशिल्ली बँकेची मालमत्ता विक्रे खातीर नोटीस जारी केल्या. 19 जुलय मेरेन मुजत आसून 20 जुलयाक लिफाफे उक्ते करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
