भांगरभूंय | प्रतिनिधी
मडगांव, प्रतिनिधी : मडगांवां रेल्वे स्टेशना लागसारा एका हॉटेला मुखार मेळिल्ले एके पोतयेची तपासणी केली तेन्ना मडगांव पुलिसांक तातूंत सोर्याच्यो बाटल्यो सांपडल्यो. पुलिसांक पळोवन ही पोती कोण तरी सांडून गेल्ल्याचो दुबाव आसा. पोतयेंतलो सुमार ९ हजारांचो सोरो मडगांव पुलिसांनी जप्त केलो.
मेळिल्ले म्हायती प्रमाण, बिरेस्तारा रातचें मडगांव पुलीस गस्त घालतना हवालदार गोरखनाथ गांवस आनी पुलीस शिपाय सुभानी शेख हांच्या पंगडाक मडगांव रेल्वेस्टेशन वाठारांतल्या हॉटेला सामकार एक पोती मेळ्ळी. पुलिसांनी तपासणी केली तेन्ना तातूंत रॉयल व्हिस्कीच्यो २१, रॉयल क्लासिकोच्यो ११५ बाटल्यो, ऍपल व्होडकाच्या १६ बाटल्यां सयत हेर सोर्याच्यो बाटल्यो सांपडल्यो. पुलिसांनी त्यो जप्त केल्यो. बाजारांत ह्या सोर्याची किंमत ८ हजार ९८६ रुपया आसा. पुलीस निरीक्षक तुळशीदास नायक हांच्या मार्गदर्शना खाला पुलीस हे पोतयेच्या धनयाचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
