भांगरभूंय | प्रतिनिधी
बस स्टॅण्डा वेली वस्ती पुलिसांनी काडली कुशीक
मडगांव: मडगांव शारांत रेल्वे, बस स्टॅण्ड वाठारांतल्या बेघरांच्या राबित्याचो प्रस्न गंभीर जाला. सोमारा कदंब बस स्टॅण्ड वाठारांत सुमार शंबर परस चड गोंया भयल्या लोकांनी राबितो केल्ल्याचें दिसून आयले उपरांत थळाव्यांनी पुलिसां कडेन कागाळ केली. पुलिसांनी सद्या तांकां बस स्टॅण्ड वाठारांतल्यान कुशीक काडल्यात.
बेकायदो घरांचो प्रस्न मडगांवकारांक सदचोच जाला. मडगांव शारांतल्या मदेकांत आशिल्ल्या गार्डनाचे सरभोंवतणी दीस-रात भिकारी आनी बेघर आशिल्ले न्हिदिल्ले दिसून येतात. सिग्नलाचेर ल्हान भुरग्यांक कमरार घेवन खूबशीं बायलां भीक मागतना दिसतात. मडगांव रेल्वे स्टेशना भायल्या फुटपाथारूय खूबशे बेघर जेवण, न्हाण आनी न्हिदिल्ले दिसून येतात. ह्या सगल्या परिस्थितीचेर उपाय येवजण जिल्हो प्रशासना कडल्यान करपाची मागणी थळावे लोक करतात. पूण अजून लेगीत हाचेर कायमस्वरुपी उपाय काडिल्लो ना.
येवपा-वचपा खातीर सोयीचे पडत आशिल्ल्यान गोंया भायल्यान येवपी टोळयांची वस्ती ही बस स्टॅण्डार आनी रेल्वे स्टेशनार आसता. थंय पियेवपाची आनी नितळसाण घरांची सोय आशिल्ल्यान गोंया भायले ह्यो सुवाती सोडून दुसरी कडेन वचनात.
सोमारा मडगांव कदंब बस स्टॅण्डा कुशीक सुमार शंबर परस चड बेघर राबित्याक आयिल्ले. फातोड्डें वाठारांतल्या लोकांनी हाचो आमकां त्रास जातलो कशी कागाळ केल्ली. हाची दखल घेवन सांजवेळा फातोड्डें पुलिसांनी गोंया भायल्यान आयिल्ल्या बेघर लोकांक कुटुंबां सयत दुसरी कडेन वचपाची सुचोवणी करून तांकां कुशीक काडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
