भांगरभूंय | प्रतिनिधी
मडगांव : मडगांवच्या कदंब बसस्ॅण्डा लागसार एके १७ वर्सां पिरायेच्या चल्याक पांच जाणांनी बरीच मारपेट केली. ही घडणूक शुक्रारा सकाळीं घडली. आदल्या वादांतल्यान मारपेट जाल्ल्याचें समजलें. ह्या प्रकरणांत फातोड्ड्यां पुलिसांनी पांच जाणां आड गुन्यांव दाखल केला. जाल्यार चार जाणांक अटक केल्या.
ह्या मारपेट प्रकरणांत शादाफ बुडेल मुल्ला (१९ वर्षे, रा. घोगळ हाउसिंग बोर्ड) हांणी फातोड्ड्यां पुलीस स्टेशनाचेर कागाळ केल्या. पुलिसांनी दिल्ले म्हायती प्रमाण, शुक्रारा सकाळीं सुमार साडे चार वरांचेर कागाळदाराचो १७ वर्सां पिरायेचो भाव मडगांवच्या कदंब बसस्टॅण्ड वाठारांत आसतना दुबावीत थंय आयले. बसस्टॅण्ड वाठारांत आसतना प्रकाश रमणा वेल्मा (रा. नेसाय), श्लोक संजय शिंदे (२२, रा. नावेले), मैफुज अस्लम सय्यद (२१, रा. नावेली), सुनील बिलावर (२०, रा. घोगळ, हाउसिंग बोर्ड) आनी अक्षय पुंडलिक तलवार (रा. बोर्डा) हांणी संगनमतान पिडेस्त चल्याक मुठी-खोटांनी मारपेट केली.
हे मारपेटींत पिडेस्त चलो जखमी जाला. दुबावितांनी मारपेट केले उपरांत त्या चल्याक गंभीर परिणाम भोगचे पडटले, अशी धमकीय दिली. आदल्या दुस्मानकायेंतल्यान हो प्रकार घडिल्ल्याचें मुळाव्या तपासांतल्यान समजलें. फातोड्ड्यां पुलिसांनी ह्या पांचूय दुबावितां आड भारतीय न्याय संहिता आनी गोवा बाल कायद्या प्रमाण गुन्यांव नोंद केला. हातुंतलो दुबावीत प्रकाश वेल्मा, श्लोक शिंदे, मैफुज सय्यद, सुनील बिलावर हांकां फातोड्ड्यां पुलिसांनी अटक केल्या. जाल्यार दुबावीत अक्षय तलवार हाचो सोद घेवप चालू आसा. फातोड्डें पुलीस हे विशीं फुडलो तपास करतात.
कदंब बसस्टॅण्डावेलो हो मारपेटीचो प्रकार आदल्या वादांतल्यान जाल्ल्याचो मुळाव्या तपासांतल्यान मुखार आयलां. तशेंच मारपेट प्रकरणांत अटक केल्ल्या दुबावितां मदले प्रकाश वेल्मा आनी सुनील बिलावर तशेंच पळून गेल्लो अक्षय तलवाराचो आसपाव फातोड्ड्यां, मुंगूल हांगा ऑगस्ट २०२५ त जाल्ल्या गँगवॉरांत आशिल्लो. ह्या प्रकरणांत सध्या हे दुबावीत जामिनाचेर बंदखणी भायर आसतना परत तांणी गुन्यांव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
