भांगरभूंय | प्रतिनिधी
सभाघरांत बरोच तेंप चर्चा, लोकांक बसता फटको
पणजी, प्रतिनिधी : पावसाक लागून मडगांवां चेंबरांतलें घाणयारें उदक शेतांत आनी रहिवाशी कॉलनींत पावपाक लागलां. हाका लागून प्रदुशण वाडपा सयत भलायकी इबाडपाचो हुस्को सभाघरांत आमदारांनी उक्तायलो. मडगांवच्या घाणयाऱ्या उदकाचेर सभाघरांत बरोच तेंप चर्चा जाली. शिरवडेंच्या घाणयाऱ्या उदकाची तांक २० एमएलडी मेरेन वाडयल्या उपरांत हो प्रस्न सुटावो जातलो, अशें आस्वासन मुख्यमंत्री डॉ. प्रमोद सावंत हांणी दिले. आमदार दिगंबर कामत हांच्या लक्षवेधी सुचोवणेचेर सभाघरांत बरोच तेंप चर्चा जाली.
मडगांवांतली सगळी सीवरेज चेंबरा भरून व्हांवता. हाका लागून घाणयारें उदक शेतांत आनी घरांनी वता. आमदार विजय सरदेसाय, निलेश काब्राल, अलेक्स रेजिनाल्ड, वेंझी व्हिएगस, क्रुज सिल्वा, युरी आलेमाव, विरेश बोरकार हांणी ह्या चर्चेत वांटो घेतलो.
ही समस्या फातोड्डें मार्केटांत पसून आसा. चिकन, नुस्तें तशेंच हेर दुकानाक प्रदुशण नियंत्रण मंडळान नोटिसी धाडल्या. चिकन तशेंच हेर दुकाना बंद करपाची शिटकावणी दिल्या. ह्यो नोटिसी फांटी घेवन दुकानां वाटावपाचे उतार मुख्यमंत्री सावंत हांणी दिले.
१९८८ – १९८९ वर्सा शिरवड्यां ७.५ एमएलडी एसटीपी प्रकल्प घालून घाणयाऱ्या उदकाची लायन सुरू केल्ली. ही लायन पोरणी जाल्या. २०१७ वर्सा ६.७ एमएलडी आनी २० एमएलडीचे दोन नवे एसटीपी प्रकल्प सुरू केले. ह्या दिसांनी पावसाचे उदक चेंबरान गेला आनी हाका लागून घाणयारे उदक व्हांवपाक लागलां. मडगांव, फातोर्डा वाठारांतली सीवरेज लायन बरीच पोरणी जाल्या. नवे सीवरेज लायनीचो वावर सुरू आसा. संपादीत केल्ल्या जाग्यार अतिक्रमणा जाल्ल्यान काम पुराय जावपाक कळाव जाता, अशें मुख्यमंत्री सावंत हांणी सांगलें.
दोनूय नव्या एसटीपी प्रकल्पांची तांक २६.७ एमएलडी आसा. घाणयाऱ्या उदकाचे प्रमाण ४१ एलएलडी आसा. हाका लागून शिरवड्यां ७.५ एमएलडीचो जो पोरणो एसटीपी प्रकल्प आसा, ताची तांक २० एमएलडी मेरेन वाडयतलें. हाचे खातीर खात्या सयत आमदारांची बसका आपयता. समन्वया खातीर खासा अधिकाऱ्यांची नेमणूक करपाचे आस्वासन मुख्यमंत्री सावंत हांणी दिले.
घाणयारें उदक टँकरा सावन भरुन व्हरपाचे प्रकार सुरू आशिल्ल्याचे ह्या वेळार विरोधी पक्ष फुडारी युरी आलेमांव हांणी सांगले. तेन्ना आतां हे प्रकार बंद जाल्यात अशें मुख्यमंत्री सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
