भांगरभूंय | प्रतिनिधी
मडगांव, प्रतिनिधी ः मडगांवच्या पोरणें बस स्टँडा लागसारच्या स्टॉलांतल्या दुकानांनी चोरी जाली. हांतूत सुमार 1 लाखांचें लुकसाण जाल्ल्याचे दुकानदारान सांगलें. हे प्रकरणात मडगांव पुलीस फुडलो तपास करतात.
मडगांवच्या जिल्लो पुलीस मुखेल कार्यालया पसून फकत 500 मीटर अंतराचेर आशिल्ल्या दुकानांनी ही चोरी जाल्या. चोरांनी दोन दुकाना फोडली. पयलीं एका उदकाच्या बाटलेच्या दुकानांत चोर घुसूले थंय चोरांक चड कितें मेळ्ळे ना. उपरांत संदीप शिरोडकार हांच्या मोबायल दुकानाचे कुलूप फोडून चोर दुकानांत भितर सरले. दुकानांतले सुमार 40 हजार रुपयांचे मोबायल आनी हेर सामान चोरले. हांतूत सुमार एक लाखांचें लुकसाण जाल्ल्याचे शिरोडकार हांणी सांगलें. सकाळीं ते दुकान उगडपाक आयले तेन्ना चोरीची घडणूक उजवाडाक आयली. ताणें हे विशीं रोखडीच मडगांव पुलिसांक म्हायती दिली. पुलिसांनी घडणूक सुवातेर येवन पळोवणी केली आनी फुडलो तपास सुरु केला.
मजगतीं, फाटल्याय वर्सा पावसाच्या दिसांनी अशीच चोरीची घडणूक घडिल्ली. त्या वेळार चोरांनी चार दुकानां फोडून दुकानांतल्यान सामान आनी पयशे फारायल्ले. अंदूं लेगीत पावसाच्या सुरवातेक चोरांनी दुकाना फोडून चोरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
