भांगरभूंय | प्रतिनिधी
मडगांव, प्रतिनिधी ः म्हापशेंच्या श्रीदेव बोडगेश्वर देवळांत हालींच दोन चोरी जाल्यो. तशेंच धर्मीक थळांक लक्ष्य करून देवळांतल्यो फंडपेटयो फोडून रोख रकम आनी मोलादीक वस्तू चोरपाच्यो घडणुकी हालींसराक बऱ्योच घडटात. म्हापशेंचें बोडगेश्वर देवळांत जाल्ल्या चोरयेची चर्चा गोंयभर सुरु आसतनाच आयज मडगांवच्या नामनेच्या दामोदर साल देवळांतल्या देवाचे मूर्तीचेर घाल्ल्यो भांगराच्यो वस्ती चोरांनी फारायल्यो. हे संबंदी फातोड्ड्यां पुलिसांनी अज्ञात चोरा आड गुन्यांव नोंद केला. चोरांचो सोद घेवपा खातीर पुलिसांनी चवकशी सुरू केल्या.
10 फेब्रुवारीक सकाळीं सुमार 10 वरांचेर ही चोरीची घडणूक घडली. निळ्या रंगाच्या एक्टिवा स्कुटरी वयल्यान आयल्लो चोर देवळांत भितर सरलो. उपरांत देवाच्या मूर्तीचेर घाल्ली भांगराची चेन आनी फुलांच्या आकाराचो भांगराचो पेंडंट घेवन चोरान थंय सावन पळ काडलो. ह्या भांगराच्या वस्तींचे मोल सुमार एक लाख आसा. ह्या प्रकरणा संबंदी माडेल-मडगांवच्या सुशांत सिनाय हांणे फातोड्ड्यां पुलिशेंत कागाळ दाखल केल्या. ही पुराय घडणूक सीसीटीव्ही कॅमेरात कैद जाल्या. पुलीस निरिक्षक नाथन आल्मेदा हांच्या मार्गदर्शना खाला उपनिरिक्षक अमीन नायक हे प्रकरणाची चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
