भांगरभूंय | प्रतिनिधी
मडगांव : मडगांव पोरण्या रेल्वे स्टेशन वाठारांत राजू अशोक कांबळे उर्फ असिफ मोहम्मद नदाफ (३५, मूळ रा. सांगली, महाराष्ट्र) हाचो सोमारा खून जाल्लो. ह्या प्रकरणांत दुबावीत सुरेश सिंह सोनार (रा. फोंडें, मूळ नेपाळ) हाका मडगांव पुलिसांनी अटक केली. ह्या दोगांय मदीं सोर्या वेल्यान झगडीं जाल्ल्याचो अदमास पुलिसांनी उक्तायला.
मडगांव पुलिसां कडल्यान मेळिल्ले म्हायती प्रमाण, सोमारा सकाळीं दोन कामगारां मदीं झगडें पेटलें. राजू कांबळे उर्फ असिफ नफाद हो मूळ सांगलीचो. तो गोंयांत रेंदेर म्हणून काम करतालो. जाल्यार सुरेश हो मूळ नेपाळचो आनी सध्या फोंडें वाठारांत रावतालो. ह्या दोगांय मदलीं झगडीं मारामारीचेर पावलीं. तेन्ना दुबावीत सुरेशान रागान हातांतली बाटली राजूचे तकलेर मारली. उपरांत ते फुटिल्ले बाटलेनूच ताणें राजूचे छातयेर वार केले. हातूंत राजू गंभीर जखमी जालो. उपरांत सुरेशान घडणुके सुवातेवेल्यान पळ काडलो. मडगांव पुलिसांनी घडणुके सुवातेर पावताच आपले गाडयेंतल्यानूच जखमी राजूक दक्षीण गोंय जिल्लो हॉस्पिटलांत व्हेलो. मात तपासणे वेळार ताका दोतोरांनी मरण आयिल्ल्याचें सांगलें.
मडगांव पुलिसांक सीसीटीव्ही कॅमेरे आनी हेर म्हायती वेल्यान दुबावीत मुंबय गेल्ल्याचें समजलें. मडगांव पुलिसांचो एक पंगड मुंबय गेलो. थंय मुंबय पुलिसांच्या सहकार्यान दुबावीत सुरेशाक अटक केली. हे विशीं मडगांव पुलीस निरीक्षक तुळशीदास नायक हांच्या मार्गदर्शना खाला फुडलो तपास चलता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
