भांगरभूंय | प्रतिनिधी
2017 वर्सा सावन आतां मेरेन आठ मुखेल अधिकारी बदल्ले
मडगांव, प्रतिनिधी ः फाटल्या वर्सा मॅन्युएल बरेंटो हांची बदली जाल्ली आनी मुखेल अधिकारी पदाचेर आशिल्ले गौरीश शंखवाळकार हांचीय 13 म्हयन्यां भितर दक्षीण गोंय जिल्लो पंचायतीच्या मुखेल कार्यकारी अधिकारी (सीईओ) पदाचेर बदली केली. समाज कल्याण खात्याचे संचालक अजीत पंचवाडकार हांचे कडेन मुखेल अधिकारी पदाचो अतिरिक्त ताबो दिला. 2017 वर्सा सावन आतां मेरेन आठ मुखेल अधिकारी बदल्ले.
मडगांवचे तेन्नाचे मुखेल अधिकारी अजीत पंचवाडकार हांची बदली 2020 वर्सा जाली. ते उपरांत आग्नेलो फर्नांडीस हांणी दोन वर्सां मुखेल अधिकारी पदांचेर काम केलें. 20 मे 2022 दिसा आग्नेलो फर्नाडीस हांची मडगांव मुखेल अधिकारी पदा वयल्यान बदली जाली. तांणी 19 म्हयने मुखेल अधिकारी म्हूण काम केलें. उपरांत रोहित कदम हांची मे 2022 वर्सा मुखेल अधिकारी म्हणून नेमणूक जाली. फकत पांच म्हयने तांणी ह्या पदाचेर काम केलें. ते उपरांत मडगांव पालिकेचे मुखेल अधिकारी रोहित कदम हांची दक्षिण गोंय जिल्लो पंचायतीचे मुखेल कार्यकारी अधिकारी म्हणून नेमणूक केली, जाल्यार त्या पदाचेर काम करपी मान्युएल बार्रेटो हांकां मडगांव पालिकेचो मुखेल अधिकारी म्हणून पद दिलें. कदम हांच्या आदले आग्नेल फर्नांडीस हांणी मडगांव नगरपालिकेच्या मुखेल अधिकारी पदाचेर 19 म्हयने काम केलें. ते उपरांत तांचीय बदली केली.
फाटलीं कांय वर्सां पसून मडगांव नगरपालिकेक कायम स्वरूपी मुखेल अधिकारी अजून मेळूंक ना. रोहित कदम हांचे उपरांत मडगांवच्या मुखेल अधिकारी पदाचेर आयिल्ल्या मॅन्युएल बारेंटो हांचीय बदली जाली आनी राज्यपाल कार्यालयांत काम करपी गौरीश शंखवाळकार हांची मडगांवचे मुखेल अधिकारी म्हणून नेमणूक जाली. आतां 13 म्हयन्यांच्या काळा उपरांत शंखवाळकार हांचीय बदली जाल्या. सध्या समाज कल्याण खात्याचे संचालक अजीत पंचवाडकार हांकां मुखेल अधिकारी पदाचो अतिरिक्त जापसालदारकी दिल्या.
अपहार प्रकरणांत तपास आनी उदरगत कामांचेर परिणाम
मडगांव पालिकेंत येणावळ वाडोवपाची समस्या अजूनय उरल्या. सोनसडो कोयराची समस्या सोडोवपाचो प्रकल्प प्रलंबीत आसा. फेस्ताच्या लिपिकांनी 17 लाखांचें केल्ल्या अपहार प्रकरणांत चवकशी आनी वसुली प्रलंबीत आसा. फकत 13 म्हयन्यांच्या काळांत मुखेल अधिकारी मंडळाची बदली जाल्ल्यान मडगांव उदरगतीच्या कामांचेर परिणाम जातलो हें निश्चित.
आदले मुखेल अधिकारी आनी तांचे कार्यकाळ
वाय. बी. तावडे – 9 मे 2016 ते 30 मे 2017
आग्नेलो फर्नांडीस – 14 जुलय 2017 ते 23 नोव्हेंबर 2017
जॉन्सन फर्नांडीस – 24 नोव्हेंबर 2017 ते 19 जुलय 2018
सिद्धिविनायक नायक – 19 जुलय 2018 ते 6 डिसेंबर 2019
अजीत पंचवाडकार – 9 डिसेंबर 2019 ते 4 ऑक्टोबर 2020
आग्नेलो ए. फर्नांडीस – 5 ऑक्टोबर 2020 ते 20 मे 2022
रोहित कदम – 20 मे 2022 ते 3 ऑक्टोबर 2022
मॅन्युएल बर्रेटो – 4 ऑक्टोबर 2022 ते 15 जून 2023
गौरीश शंखवाळकार – जून 2023 ते 27 जुलय 2024
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
