भांगरभूंय | प्रतिनिधी
लोकसभा वेंचणुकेचें वारें व्हांवता. तातूंत चड करून लोक दक्षीण गोंयच्या सुवाते विशींच उलयतात. कित्याक तर उत्तर गोंयांत केंद्रीय मंत्री श्रीपाद नायक पांच फावटीं जिखून आयल्यात. तेवूय बी एक लाख मायज मतां घेवन. काँग्रेसीन तांकां हारावपाक 2014 वर्सा रवी नायक हांकां उबे केले. मात भंडारी आड भंडारी आनी भोवजना आड भोवजन उमेदवार जावन लेगीत, भाजपाचे श्रीपाद नायक 1,05, 599 मतांनी तेन्ना जिखून आयले. उपरांत गिरिश चोडणकारय तांच्या आड उबो रावले. पूण श्रीपाद नायकूच जिखले. तांचीं मतां तशीं देंवलीं नात. हे खातीर लोक गृहीत धरून आसात की तेच जिखतले. फकत राजकारणांत केन्ना कितें घडत हें सांगूंक शकना. इतलेंच…
दक्षिण गोंयांतूच पळयात! भाजपाचे आदले खासदार अॅड. नरेंद्र सावयकार 2019 चे वेंचणुकेंत पडले तेन्ना सावन लोकां मदीं आशिल्ले. ते सदांच मतदारसंघांत भोंवून कार्यावळींनी वांटो घेताले. मात अखेरेक पक्षान तांकां तिकेट दिली ना. केपेंचे आदले आमदार चंद्रकांत कवळेंकार हे लेगीत तिकेट मेळोवपाचे सर्तींत आशिल्ले. तशें गोंयच्या राजकारणांत चंद्रकांत कवळेंकार हें एक व्हड नांव… पूण पक्षान तांच्याय नांवाचो विचार केलोना. भाजपाचे फुडारी आतां म्हणटात ते प्रमाण महिलांक आरक्षण मेळचे आदींच तांणी दक्षीण गोंयांत महिला उमेदवार दिवन एक नवी देख घाल्या.
राजकारणांत महिला तश्यो फांटी नात. भाजपाची आदली फुडारी सुषमा स्वराज हांणी राजकी मळार बरें योगदान दिलां आनी संसदेंत विशय बरे तरेन मांडल्यात. ते खातीर महिलांक संद दिवपाचो निर्णय येवकाराचोच. मात आपल्या पक्षांत वावुरपी महिलांक सोडून भाजपान उद्येगपती पल्लवी धेंपो हांकां तिकेट दिल्ल्यान लोकांनी अजाप उक्तायलें. अजापूच तें!!! धेंपो कुटुंबाचें खेळां मळार आनी समाजीक मळार व्हड योगदान आसा. आपल्या आस्थापनांतल्यान तांणी तशीं कामां केल्यांत. मात पल्लवी धेंपो राजकी मळार नाशिल्लीच…. तिचे खातीर हें सगळें नवें…
दक्षीण गोंयचो मतदारसंघ जिखप हो फकत भाजपा खातीरच न्हय तर धेंपो कुटुंबा खातीरय तसो प्रतिश्टेचो आसा. हे खातीर राजकी ‘गणितां’ करूनच तांणी आनी भाजपान हें पावल मारलां आसतलें हातूंत दुबाव ना. तांच्या ह्या गणितांत घडये मुखेल घटक आसा तो महाराष्ट्रवादी गोमंतक पक्ष, कित्याक तर फाटले फावट नरेंद्र सावयकार हांकां उडोवपाक होच प्रादेशीक पक्ष जबाबदार आशिल्लो. मुख्यमंत्री प्रमोद सावंत हांणी मडकयचे आमदार आनी मगोचे फुडारी सुदिन ढवळीकार हांकां मंत्रिमंडळांतल्यान काडटकच, तांणीय आपली राजकी खेळी खेळिल्ली आनी सावयकाराक उडयल्लो. तेन्ना घडये भाजपाकूय ह्या पक्षाचें म्हत्व होलमलें आनी 2022 ची विधानसभा वेंचणूक जातकच, कांय आमदारांचो विरोध आसुनूय सुदिन ढवळीकार हांकां मंत्रिमंडळांत परत सुवात मेळ्ळी. आतां तर तांणी आपूण मडकयच्यान 80 टक्के मतां पल्लवी धेंपो हांकां दितलों, अशें भर सभेंत सांगलां. आदीं कितें जालें तें जालें, आपूण आतां सरकारांत आसा आनी हीं मतां दिवप आपलें कर्तव्य अशें सुदिनबाब म्हणटात. आपल्याक मडकय मतदारसंघांत मतां मागपाक भोंवचो पडना आनी आपूण केन्ना जाहीर सभाय आयोजीत करिना अशेंय तांणी सांगलें. हे खातीर मडकय मतदारसंघांत तांच्या उतराक मान आसा आनी घडये आपलें फुडलें राजकीय अस्तित्व तिगोवन दवरपाक सुदिनबाब आपलें उतर पाळटलोय. हाच्या वयल्यान राजकारण कशेंय आनी केन्नाय बदलता हें सिद्ध जाता. एकामेकाक गाळयो घालपी राजकारणी लेगीत सत्ते खातीर एकठांय येतना गोंयच्या मतदारांनी पळयलां आनी पळयतात. अशा वेळार ते आपलो पोको स्वाभिमान आनी पोकीं तत्वां खुटयाळाक लायतात.
जो मगो पक्ष नरेंद्र सावयकार हांच्या पराभवाक जबाबदार थारलो, तोच आयज भाजपाक धीर दिता. मडकय सोडून फोंडें, शिरोडें आनी सांवड्डें मतदारसंघातूय मगोचे मतदार आसात. हीं मतां भाजपाक मेळ्ळीं जाल्यार, मतमेजणी जातना भाजपाक उमेदीचेच खीण दितलो…
समीर नायक
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
