भांगरभूंय | प्रतिनिधी
मडगांव : कोकण रेल्वे पुलिसांनी रोखडीच कारवाय करून मंगळूर खुनांतल्या दुबावीताक कांय वरांनीच मडगांव रेल्वे स्टेशनाचेर अटक केली. प्रशांत कुमार (३६, रा. शिवाजी नगर, दरभंगा, बिहार) अशें अटक केल्ल्या दुबावीताचें नांव.
१० जुनाक सांजेवेळार सुमार ७ वरांचेर कारवार पुलिसांनी कोंकण रेल्वे पुलिसांक हे विशीं म्हायती दिली. मंगळुरच्या पणम्बूर पुलीस स्टेशनांत दाखल आशिल्ल्या एका खुनाच्या गुन्यांवांतलो प्रशांत नांवाचो दुबावीत ’हजरत निजामुद्दीन एक्सप्रेस’न गोंयचे वटेन येता अशें कारवार पुलिसांनी सांगिल्लें.
हे विशीं म्हायती मेळटांच कोंकण रेल्वेचे पुलीस निरीक्षक विक्रम नायक हांच्या मार्गदर्शना खाला बेगोबेग एका विशेश पंगडाची स्थापना केली. ह्या पंगडांत पुलीस उपनिरीक्षक जितेंद्र गावडे, पुलीस कॉंस्टेबल वसीम शेख, मंजुनाथ दोडमणी आनी संजय गंावकार हांचो आसपाव आशिल्लो. ह्या पंगडान मडगांव रेल्वे स्टेशनाचेर वेगवेगळे सुवातेर सापळो रचलो. रेल्वे स्टेशनावेल्यो सीसीटीव्ही फुटेजी, तांत्रीक विश्लेशण आनी गुपीत म्हायतीच्या आदारार पुलिसांनी दुबावीत प्रशांत कुमार हाका ताब्यांत घेतलो.
दुबावितांक रेल्वे पुलीस स्टेशनांत हाडून ताची खोलायेन चवकशी केली तेन्ना, तांणी गुन्यांवाची कबुली दिली. हे अटकेची म्हायती पणम्बूर (मंगळूर) पुलीस स्टेशनाचे पुलीस निरीक्षक मोहम्मद सलीम हांकां दिल्ल्यान, फुडले कायदेशीर प्रक्रिये खातीर दुबाविताक कर्नाटक पुलिसांच्या ताब्यांत दिवपाची कारवाय सुरू आसा. सध्या दुबावीत कोकण रेल्वे पुलिसांचे बंदखणींत आसा. ही पुराय कामगिरी कोंकण रेल्वेचे पुलीस अधीक्षक शेखर प्रभूदेसाय हांच्या मार्गदर्शना खाला पुलीस निरीक्षक विक्रम नायक, पुलीस उपअधीक्षक हिरू कवळेकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
