भांगरभूंय | प्रतिनिधी
पणजी: जिल्ह्यांतलो कायदो आनी सुवेवस्थेचे फाटभूंयेर उत्तर गोंय पुलिसांनी फाटल्या सप्तका सावन गुन्यांवकारांचेर खर लक्ष दवरलां. तशेंच गुन्यांवकारी कारवायांक आळो घालपा खातीर आनी भौशीक सुरक्षितताय राखपाक खुबश्या सक्रीय उपायांची अंमलबजावणी केल्या.
फाटल्या सात दिसांनी गुन्यांवकारी भुतकाळ आशिल्ल्या सुमार १०० हिस्ट्री शीर्ट्सांची खर तपासणी पुलिसांनी केल्या. गुन्यांवकारी भूतकाळ आशिल्ल्या व्यक्तींचेर बारीक नदर दवरपा वांगडा तांचे दरेके हालचालींचेर पुलीस लक्ष दवरून आसात. ड्युटी अधिकार्यांक रातच्या वेळार हिस्ट्री शिटर्सच्या घरांची अचकीत तपासणी करपाच्यो सुचवण्यो दिल्यात. तांचे दरेके क्रियेचेर आनी ते दिल्ले नेम पाळटात काय ना हाचेर लक्ष दवरपाक अशें केलां.
पाळत वाडयली
उत्तर गोंयच्या सगळ्या खांप्या गुन्यांवकारावेली पाळत आनीक खर केल्या. खंयचेय जावपी गुन्यांवकारी गजालीक आळो घालप आनी गरज पडल्यार रोखडीच कारवाय करप हो ह्या केल्ल्या उपायांचो हेत जावन आसा.
उत्तर गोंयच्या सगळ्या पुलीस स्टेशनांक (पीएस) नवीन हिस्ट्री शीट तयार करपा खातीर सक्रियपणान प्रकरणां वळखपाचे निर्देश दिल्यात. हाका लागून पुलिसांक नव्या गुन्यांवकारांक वळखुपाक आनी येवपी धोक्यांक तोंड दिवप शक्य जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
