भांगरभूंय | प्रतिनिधी
भांगरभूंय । प्रतिनिधी
पोरणे गोंयः उत्तर गोंयचो खासदार म्हणून लोकांनी वेंचून दितगीर भोमा हांगच्या थळाव्या लोकांक सतावपी म्हामार्ग रुंदिकरणाचो प्रश्न सुटावो करपाक आपूण प्राधान्य दितलों अशें उत्तर गोंयांतले इंडी आघाडेचे उमेदवार अॅड रमाकांत खलप हांणी आयतारा भोमा हांगा घेतिल्ले प्रचार सभेंत उलयतना सांगलें. तुमी म्हज्या फाटल्यान रावात, हांव सरकारांत आसू वा नासूं पूण तुमच्या रस्त्याचो प्रश्न हांव सगल्यांत पयलीं हातांत घेवंन तो सुटावो करतलों अशें तांणी भोमकारांक सांगलें. भाजपाचे फुडारी नारी शक्तीचीं बातां मारतात मात केंद्रीय कायदो मंत्री आसतना 12 सप्टेंबर 1996 दिसा आपणे संसदेंत बायल आरक्षण विधेयक मांडिल्लें. तेंच आतां प्रधानमंत्री नरेंद्र मोदी हांणी परत मांडलां असो दावो खलप हांणी केलो.
फातोड्डेचो आमदार आनी गोवा फॉरवर्डाचे अध्यक्ष विजय सरदेसाय हांणी भाजपा सरकाराचेर खर उतरांनी टिका केली. थळाव्याच्या देवळा वयल्यान फ्लाय ओव्हर बांदपाच्या सरकारी येवजणे विशीं उलयतना, ह्या हिंदुत्वावादी भाजपाक बायपासाचो बरो पर्याय आसतना देवाक फ्लाय ओव्हरा खाला दवोरन अशें दिसता हाचे वयल्यान तांचें हिंदुत्व कसले तरेचें हें दिसून येता अशें तांणी सांगलें. भोमांत लोकांची मागणी मतींत घेवन बायपास रस्त्याा खातीर आपणे केंद्रीय म्हामार्ग मंत्री नितीन गडकरी हांका तयार केल्लें मात एका थळाव्या भाजपा फुडाऱ्यांत तातूंत आडो घातलो. भाजपान तुमकां गृहीत धरलां. तुमच्या देवाक किदेंय केलें तरी तुमी भाजपाक मतां दितलें अशें तांकां दिसता. तुमी खलप हांगा लोकसभेंत धाडल्यार तुमचो प्रश्न सुटावो जातलोच म्हणून समजा अशें तांणी भोमकारांक सांगलें.
म्हामार्ग रुंदिकरणाक पर्याय आसतनाय भोमकारांचे मागणे कडेन आडनदर करपी भाजपा सरकाराचेर आमदार अॅड कार्लुस फेरेरा हांणी तिडक काडली. जें सरकार लोकांचें आयकना तांका सत्तेर आसपाचो कसलोच हक्क उरना. लोकसभा वेंचणुकेच्या निमतान लोकांनी एकठांय येवन ह्या सरकाराक घरा धाडपाचें आवाहन तांणी केलें. 25 वर्सा खासदार आसून लेगीत श्रीपाद नायक हांणी कुस्कुटाचेंय काम केलें ना. श्रीपाद नायक हांणी किदें केलां हाचे बारीकसाणेत लोकांनी चितून पळोवपचें आनी आपलो आवाज म्हणून रमाकांत खलप हांका लोकसभेंत धाडचें अशें तांणी मागलें. राजन घाटे, सुरेल तिळवे, रामकृष्ण जल्मी, संजय नायक हांची सभेंत भाशणा जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
