भांगरभूंय | प्रतिनिधी
पेळावदा रावण सत्तरींतली घडणूक; अधिकाऱ्यांची आडनदर
भांगरभूंय । प्रतिनिधी
केरी- सत्तरीः केरी सत्तरी वाठारांतल्या पेळावदा रावण सत्तरी वाठारांत भुंयगत वीज केबल घालपा खातीर खणिल्ल्या चरांत दोन दिसां आदीं राती वेळार दोन म्हशी पडल्यो. भायर येवंक मेळनाशिल्ल्यान त्यो चरांत आडकून उरल्यो. तातूंतले एके म्हशीक जाल्यार मातूय हालपाक मेळनाशिल्लें.
फाटल्या कांय दिसांच्यान ह्या वाठारांत भुंयगत वीज केबल घालचे खातीर खणप चालू आसा. म्हशी पडिल्ल्याचें दुसऱ्या दिसा सकाळीं लक्षांत आयले उपरांत म्हशींचो धनी रघी माईणकार आनी गांवचे हेर लोक घडणुकेचे सुवाचेर आयले. तांणी हे घडणुकेची खबर चर खणपी कंत्राटदाराक दिली. ते उपरांत ताचे जेसीबी मशीन आनी कर्मचाऱ्यांनी येवन चराची रुंदाय वाडयली आनी म्हशींक भायर काडल्यो. भुंयगत वीज केबला खातीर चर खणटना कंत्राटदारान धोक्या विशीं सादुरताय बाळगुवप गरजेचें आसा. 100 मिटर चर खणले उपरांत त्या चराच्या धोक्या विशां तकटो लावचो आनी थंय धोको दाखोवपी पट्टी लावची. वीज केबल घेतले उपरांत रोखड्या रोखडो तो चर पुरोवचो, अशे तरेची मार्गदर्शक तत्वां पाळून काम करपाचें आसता. पूण पेळावदा वाठारांत अशीं कसलींच तत्वां पाळिनात. 100 मिटर खणचे बदला थेट दोन किलोमिटर मेरेन चर खणिल्ले दिसतात. अश्या सगळ्या कामांचेर नदर दवरपाची जापसालदारकी वीज खात्याच्या संबंदीत अधिकाऱ्यांची आसता, पूण पेळावदा वाठारांत संबंदितांनी पुराय आडनदर केल्या. हे खातीर संबंदीत अधिकाऱ्याचेर कारवाय करची अशी थळाव्या लोकांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
