भांगरभूंय | प्रतिनिधी
कोरगांव, बातमीदार : खून प्रकरणांतले दुबावीत सतीश कुल्लू आनी जुनेल कुल्लू हांकां आयज पेडणें पुलिसांनी न्यायालया सामकार उबे केले. तेन्ना तांकां चवकशे खातीर णव दिसांची पुलीस बंदखण फर्मायली.
काल सकाळीं न्हंयबाग हांगा तेरेखोल न्हंयेंत अबनेजर मुलनबीन कुल्लू हाची कूड उफेतना दिसली. पेडणें पुलिसांनी केल्ल्या तपासांत अबनेजर कुल्लू हाचो खून जाल्ल्याचे स्पश्ट जाले उपरांत पुलिसांनी दोगूय दुबावितांक अटक केल्ली. नायलॉनचे दोरयेंत गळ्याक फास घालून अबनेजर कुल्लू हाचो खून केलो आनी ताची कडू तेरेखोल न्हंयत उडयली. खून जाल्ली व्यक्ती आनी दुबावीत मूळ झारखंडाचे. अबनेजर कुल्लू आनी जुनेल कुल्लू हे दोगूय सख्खे भाव. झारखंडांत तांचो वाद चालू आसा, जाल्यार सतीश कुल्लू हो तांचो शेजारी. जुनेल कुल्लू हो मळेवाड, सिंधूदुर्ग हांगा जाल्यार अबनेजर कुल्लू आनी सतीश कुल्लू हे काजू बागायतींत मानाय म्हणून काम करतात.
१९ तारखेर ते तिगूय एके कडेन सोरो पिवपाक बसले. तेन्ना दोगांय भावां मदीं जमनी वयल्यान झगडें पेटलें. उपरांत दोनूय दुबावितांनी नायलॉनचे दोरयेचो फास अबनेजरच्या गळ्या भोंवतणी घालून ताचो खून केलो. पेडणें पुलीस निरीक्षक सचीन लोकरे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
