भांगरभूंय | प्रतिनिधी
दक्षीण आफ्रिके आडचे पयले टॅस्टीच्या पयल्या दिसा भारतान 59 ओव्हरींनी 8 विकेटी वगडावन 208 धांवड्यो केल्यात. मदले फळयेंतलो बॅट्समन लोकेश राहुलान संयमान बॅटींग करून 70 धांवड्यां सयत खेळपट्टीचेर आसा.
वयले फळयेंतले आनी मदले फळयेंतले बॅट्समन अपेशी थारले. राहुलाक सोडलो जाल्यार हेर एकाय बॅट्समनाक व्हड खेळी करपाक जमली ना. रोहित शर्मा, शुबमन गिल, यशस्वी जयस्वाल खेळगडे रोखडेच बाद जाले, जाल्यार विराट कोहली आनी श्रेयस अय्यर हे दोगूय बरी सुरवात मेळोवन लेगीत आपलो दम दाखोवपाक अपेशी थारले. अशे परिस्थितींत उप मुखेली राहुलान एक बाजू सांबाळून धरतना उत्कृश्ट बॅटींग केली. ताचेच बॅटिंगेक लागून भारताक दोनशेंचो आंकडो हुपपाक जमलो.
भारता वतीन राहुलान एक बाजू सांबाळून धरली. ताचे खेरीत विराट कोहलीन 38 आनी श्रेयस अय्यरान 31 धांवड्यांचें योगदान दिलें. शार्दुल ठाकूरान लेगीत 24 धांवड्यो करीत राहुलाक बरी साथ दिली. दक्षीण आफ्रिके वतीन कगिसो रबाडान 5 विकेटी घेतल्यो, जाल्यार नांद्रे बर्गरान 2 विकेटी मेळयल्यो.
पयलीं बॅटींग करतना भारताचो मुखेली रोहित शर्मा 5 धांवड्यो करून बाद जालो. यशस्व जयस्वालान मात्शीशी आक्रमक सुरवात केल्ली. पूण, तो लेगीत 17 धांवड्यांचेर बाद जालो. युवा बॅट्समन शुभमन गिल 2 धांवड्यो करून धांवबाद जालो. ते उपरांत कोहली आनी श्रेयस हे जोडयेन संयमी खेळ केलो. तांणी 68 धांवड्यांची भागिदारी केली. पूण, पंगडाचो धांवतकट्याचेर शंबराचो आंकडो लागचे पयलींच अय्यर 31 धांवड्यो करून तंबूंत परतून गेलो. ताणें तीन चवके आनी दोन सके मारले.
कोहलीन एक बाजू सांबाळून बॅटींग करतालो. पूण, ताका लेगीत व्हड खेळी करपाक जमली ना. ताणें पांच चवक्यां सयत 38 धांवड्यो केल्यो. राहुलान मात भारताची लज राखली. ताणें एके बाजून शांत आनी संयमी खेळी चालूच दवरली. आर आश्विन (8) आनी जसप्रीत बुमरा (1) रोखडेच बाद जाले. शार्दुल ठाकूरान धांवसंख्येक मात्सो हातभार लायलो. ताणें तीन चवक्यांचे मजतीन 24 धांवड्यो केल्यो.
पावसाक लागून खेळ थांबोवचो पडलो, त्या वेळार राहुलान 105 बॉलांनी 10 चवके आनी दोन सक्यांचे मजतीन 70 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
