भांगरभूंय | प्रतिनिधी
येजमान न्युझिलॅण्ड पंगडान अणभवाच्या नेटार भारताक पयले वन डे मॅचींत 7 विकेटींनी हारयलो. भारताच्या 307 धांवड्यांचो फाटलाव करपी न्युझिलॅण्डाची सुरवात बरी जाली ना. पूण, मुखेली केन विलियम्सन आनी टॉम लॅथम हे जोडयेन चवथे विकेटी खातीर 221 धांवड्यांची भागिदारी करून आपल्या पंगडाक मॅच जिखून दिली. ताणें 47.1 ओव्हरींनी 3 विकेटी वगडावन 309 धांवड्यो केल्यो.
मुखेली शिखर धवनान सोडिल्ली कॅच, शार्दुल ठाकूरान एके ओव्हरींत दिल्ल्यो 25 धांवड्यो आनी बॉलरांक अणभवाचो उणाव हीं भारताचे हारी फाटल्यान कांय कारणां आशिल्लीं.
ते पयलीं शिखर धवन (72) आनी शुभमन गिल (50) हांणी भारताक बरी सुरवात करून दितना पयले विकेटी खातीर 124 धांवड्यांची भागिदारी केली. पूण, ऋषभ पंत (15) आनी सुर्यकुमार यादव (4) अपेशी थारले. जाल्यार श्रेयस अय्यर (80) आनी संजू सॅमसन (36) हांणी 77 बॉलांनी 94 धांवड्यांची म्हत्वाची भागिदारी केली. दुखापतींतल्यान पुर्ण बरो जावन पुनरागमन करपी वॉशिंग्टन सुंदरान 16 बॉलांनी तीन चवके आनी तीन सक्यांचे मजतीन नाबाद 37 धांवड्यो केल्यो. ताका लागून भारताक निर्धारीत 50 ओव्हरींनी 7 विकेटी वगडावन 306 धांवड्यो केल्यो.
प्रत्तुत्तर दितना न्युझिलॅण्डान 88 धांवड्यांचेर तीन विकेटी वगडायिल्ल्यो. पूण, विलियम्सन आनी लॅथम हांणी डाव सांबाळ्ळो. 36वे ओव्हरींत ही जोडी फोडपाची बरी संद भारताक मेळिल्ली. पूण, धवनान विलियम्सनाची सोंपी कॅच सोडली. उम्रान मलीक आनी अर्शदीप सिंग ह्या बॉलरांचो अणभव उणो पडटालो आनी किवीचे जोडयेन ताचो फायदो घेतलो.
शार्दुलाचे एके ओव्हरींत एक सको आनी चार चवके दिले. लॅथमान (नाबाद 145) 76 बॉलांनी शेंकडो पुर्ण केलो. विलियम्सनान 94 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
