भांगरभूंय | प्रतिनिधी
इंग्लंडा आड चालू आशिल्ले निमाणे टॅस्टींत भारतान 255 धांवड्यांची व्हड आघाडी घेतल्या. दुसऱ्या दिसाचो खेळ सोंपलो त्या वेळार भारतान आपल्या पयल्या डावांत 8 विकेटी वगडावन 473 धांवड्यो केल्यात. जसप्रीत बुमरा 19 आनी कुलदीप यादव 27 धांवड्यांचेर खेळटा.
भारतान सकाळीं 1 बाद 135 धांवड्यां वयल्यान खेळपाक सुरवात केली. मुखेली रोहीत शर्मान 52 आनी शुभमन गिल 26 धांवड्यां वयल्यान मुखार खेळपाक सुरवात केली. जेवणाच्या विसवा मेरेन दोगांयनी आपलेआपले शेंकडे पुर्ण केले.
रोहीतान 103 आनी शुभमन गिलान 110 धांवड्यांचें योगदान दिलें. दोगांयनी दुसरे विकेटी खातीर 171 धांवड्यांची भागिदारी केली. रोहीताचो हो 12वो जाल्यार गिलाचो चवथो टॅस्ट शेंकडो थारलो. ही जोडी फुटली त्या वेळार भारतान पयल्या डावांत 57 धांवड्यांची आघाडी घेतिल्ली. ही जोडी बेन स्टोक्सान फोडली. ताणें रोहीताक बाद केलो.
ते उपरांत मदले फळयेंतले बॅट्समन देवदत्त पड्डिकल (65) आनी सरफराज खान (56) हांणी अर्द शेंकडे पुर्ण करून भारताची स्थिती घटमूट केली. दोगांयनी चवथे विकेटी खातीर 132 बॉलांनी 97 धांवड्यांची भागिदारी केली.
इंग्लंडा वतीन स्पिनर शोएब बशीरान चार बॅट्समनांक बाद केले. जाल्यार टॉम हार्टलेन दोन विकेटी घेतल्यो. जेम्स अॅण्डरसन आनी स्टोक्स हांकां दरेकी एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
