भांगरभूंय | प्रतिनिधी
ऑस्ट्रेलिये आड बॉर्डर-गावस्कर ट्रॉफीचे चवथे आनी निमाणे टॅस्टीच्या पांचव्या दिसा भारताच्या बॉलरांक खेळपट्टींतल्यान खाश अशी मजत मेळूंक ना. पूण, घरच्या वातावरणांत शेक दवरतना माळ 2-1 अशा फरकान जिखली. भारतान ही मॅच सोंपचे पयलींच सेगीत दुसरे खेपे संवसारीक टॅस्ट वस्तादपण सर्तीचे फायनलींत सुवात मेळयली.
क्रायस्टचर्च टॅस्टींत येजमान न्युझिलॅण्डान श्रीलंका पंगडाक दोन विकेटींनी हारयलो आनी ताका लागून भारताची संवसारीक टॅस्ट वस्तादपण सर्तीचे फायनलींत पावलो.
भारत आनी ऑस्ट्रेलिया ह्या पंगडां मदली चवथी टॅस्ट सुरू जावचे पयलीं श्रीलंकेक संवसारीक टॅस्ट वस्तादपण सर्तीचे फायनलींत पावपा खातीर न्युझिलॅण्डाचे भोंवडेर 2-0 अशा फरकान जैत जोडपाक जाय आशिल्लें. पूण, माळेंतले पयलेच मॅचींत हार घेवची पडिल्ल्यान भारताची फायनलींतली सुवात निश्चीत जाली.
ऑस्ट्रेलियेन फाटले मॅचींत जैत जोडून फायनलींतली सुवात निश्चीत केल्ली. फायनल 7 जूना सावन लडनांतल्या धी ओव्हलांत सुरू जातली. मजगतीं, भारतान ऑस्ट्रेलिये आड सेगीत चवथे खेपे टॅस्ट माळ जिखली. हाचे पयलीं 2017त घरच्या मैदानांचेर खेळटना भारतान जैत जोडिल्लें, ते उपरांत ऑस्ट्रेलियेचे भोंवडेर 2018-19 आनी 2020-21त जैत जोडिल्लें.
मॅचीच्या पांचव्या आनी निमाण्या दिसा ऑस्ट्रेलियेच्या बॅट्समनांनी कसलेंच चेपण घेनासतना बॅटींग सरावाचेर भर दिलो.
दिसाचे सुरवातीक कुहनमॅन बाद जाल्या उपरांत ओपनर ट्रॅव्हिस हेड आनी मार्नस लाबशेन हांणी रक्षात्मक खेळ करून भारताच्या बॉलरांक आपलो शेक दवरपाक संद दिली ना.
हेडान 163 बॉलांनी 10 चवके आनी 2 सक्यांचे मजतीन 90 धांवड्यो केल्यो, तशेंच लाबशेना वांगडा दुसरे विकेटी खातीर 139 धांवड्यांची भागिदारी केली. दोनूय मुखेली मॅच बादाबाद दवरपाक सहमत जाले त्या वेळार लाबशेन 63 आनी स्मिथ 10 धांवड्यो करून खेळटाले. ह्या वेळार ऑस्ट्रेलियेचो स्कोर 2 बाद 175 (डाव घोशीत) जाल्लो.
मजगतीं, श्रीलंके आडचे टॅस्टीच्या पांचव्या दिसा न्युझिलॅण्डाक जैता खातीर 257 धांवड्यांची गरज आशिल्ली. न्युझिलॅण्डान 1 बाद 28 धांवड्यां वयल्यान मुखार खेळपाक सुरवात केली. केन विलियम्सनान शेंकडो मारून पंगडाचें जैत निश्चीत केलें. ताणें 194 बॉलांनी नाबाद 121 धांवड्यो केल्यो. हातूंत 11 चवक्यांचो आनी एका सक्याचो आस्पाव आशिल्लो. विलियम्सना खेरीत रॅरिल मिचेलान 81 धांवड्यांची म्हत्वाची खेळी केली. श्रीलंके वतीन असिथा फर्नांडोन सगल्यांत चड तीन विकेटी घेतल्यो. ताचे खेरीत प्रभात जयसुर्यान 2, कासुन रजिथा आनी लाहिरू कुमारा हाणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
