भांगरभूंय | प्रतिनिधी
भांगरभूंय । प्रतिनिधी
दिवचलः भारत विकास परिशदेच्या दिवचल फाट्यांची अधिकारग्रहण कार्यावळ दीनदयाळ सभाघरांत आयतारा जालें. अनिल वेंगुर्लेकार हाका अध्यक्षपदाची, सदानंद जोशी हाता सचिवपदाची आनी श्रीकृष्ण धोंड हाका भांडारीपदाची सूत्रां दिलीं. संजय सालेलकार, गुरुदास कामत, सचीन सूर्यवंशी, रामचंद्र पळ, आश्विनी लामगांवकार, जय खर्वे, मोहन कामत, संजय नायक, शिवप्रसाद नायक, राजाराम परब हें परिशद समितीचे वांगडी आसात.
आमचो देश समस्यांत घुस्पल्ले कडेन आसा. तातूंतल्यान भायर सरपा खातीर एक वटेन मेकिंग इंडिया गट वावुरता जाल्यार दुसरे वटेंन ब्रेकिंग गट समस्या वाडयता. तांचे मदीं आशिल्लो लुकींग इंडिया गट दोगां कडेन फकत पळयत आसा. ह्या गटान फुडें सरून स्वामी विवेकानंद हांचो आदर्श दोळ्यां सामकार दवोरून राष्ट्र निर्मणे खातीर योगदान दिवपाची गरज आसा, अशें मुखेल सोयरे प्रा. दिलीप बेतकेकार हांणी ह्या वेळार सांगलें.
कार्यावळीक उद्देजक रमाकांत शेट्ये, परिशदेचे राज्य अध्यक्ष किरण वेर्णेकार, उपाध्यक्ष मकरंद कामत, राज्य सचीव यदुचंद्र नायक, अस्तमतो अध्यक्ष सूर्यकांत देसाय, आनंद जोशी, श्रीकृष्ण धोंड हाजीर आशिल्ले. रमाकांत शेट्ये हांणी भारत विकास परिषदेच्या वावराची तोखणाय केली. परिषदेच्या दिवचल फाट्याचें काम सगल्यांच्या सहकार्यान फुडें व्हरतले अशें अध्यक्ष अनिल वेंगुर्लेकार हांणी सांगलें. योगेंद्र बांदेकारान मानेस्तांची वळक करून दिली
डॉ प्रवीण सावंत, दिलीप होबळे, संजय सालेलकार आनी संध्या खानोलकार हांचो ह्या वेळार भोवमान केलो. सूर्यकांत देसाय हांणी येवकार दिवन प्रास्तावीक केलें. अनिल वेंगुर्लेकारान अहवाल सादर केलो. श्रध्दा धोंड आनी गायत्री वाडकारान सूत्रसंचालन केलें. आनंद जोशीन उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
