भांगरभूंय | प्रतिनिधी
भांगरभूंय । खबरां मेज
मुंबयः एक लक्ष्य, संवसारीक कप अश्या निर्धारान खेळटना भारतीय क्रिकेट पंगडान मुंबयच्या वानखेडे स्टेडियमाचेर सेमी फायनलींत न्यूझिलंडाचें आव्हान 70 धांवड्यांनी मोडून काडून अंदूच्या वन-डे संवसारीक क्रिकेट सर्तीच्या फायनलींत प्रवेश केलो. वन-डे क्रिकेटींत शेंकड्याचो अर्द शेकडो (50) करपाचो विक्रम करपी किंग कोहली आनी 57 धांवड्यांत 7 विकेटी घेवपी मोहम्मद शामी हांणी भारताक फायनलींत व्हेलें. वन-डेत भारता वतीन सगल्यांच चड विकेटी घेवपी शामी मॅन ऑफ दी मॅच थारलो.
आपल्या घरच्या मैदानार भारताचो कॅप्टन रोहित शर्मान टॉस जिखून पयलीं बॅटिंग करपाचो निर्णय घेतलो आनी 29 बॉलांत चार चौके आनी 4 सक्यांनी 47 धांवड्यो करून पंगडाक बरी सुरवात करून दिली. विराट कोहलीन शुभमन गील, श्रेयस अय्यर हांच्या वांगडा व्हडल्यो भागिदारी करून भारताच्या जैताची बुन्याद घातली. 8 चौके आनी 3 सक्यांनी 80 धांवड्यो करपी गिलान पायाक गुळो आयिल्ल्यान बॅटिंग अर्दवट सोडून वच्चें पडलें. ह्या उपरांत विराट आनी श्रेयस अय्यरान सगलीं सूत्रांत हातांत घेवन न्यूझिलंडाच्या बॉलरांक शेळो घाम काडलो. विक्रमी 50 व्या शेकड्याच्या लागीं आसतना विराटाच्या पायांक गुळो आयलो पूण सादी मलमपट्टी करून तो खेळपाक लागलो आनी क्रिकेटचो देव सचीन तेंडुलकार हाचे हाजेरेंत ताचो 49 वन-डे शेंकड्याचो विक्रम मोडपाचें काम ताणे केलें.
विराटान 2009 वर्सा श्रीलंके आड वन-डे कारकिर्दींतलो पयलो शेंकडो केल्लो. 279 डावां उपरांत ताणे 50 शेंकड्याचो आंकडो हुपलो. आंतरा राष्ट्रीय क्रिकेटींत ताचे आतां 80 शेंकडे जाल्यात. टॅस्ट मॅचींत ताच्या नांवार 29 शेंकडे आनी टी-20त एक शेंकडो आसा. आपलो 49 शेंकड्यांचो विक्रम घडये विराट कोहली मोडपाक शकता अशें सचीनात सांगल्लें. ताचे ते शब्द विराटान ताचेच हाजेरीत खरे करून दाखयलें. 1 9 13 बॉलांत 117 धांवड्यो करतना विराटान 9 चौके आनी 2 सके मारले
पंगडाक 327 धांवड्याचेर व्हरून दवोरले उपरांत विराटाक टीम सावदीन कॅच आवट केलें. 70 बॉलांत 8 सके आनी 4 चौक्यांनी शेंकडो (105) करून श्रेयस अय्यर पंगडाच्या 381 धांवड्यांचेर कॅच आवट जालो. सूर्यकुमार यादव (1) आवट जातगीर शुभमन गील परत खेळपाक आयलो. राहुलान 5 चौके आनी 2 सक्यांनी नाबाद 39 धांवड्यो केल्यो. 50 ओव्हरींत 4 आवट 397 धांवड्यो करून भारतान न्यूझिलंडाक जैता खातीर 398 धांवड्यो करपाचें आव्हान दिलें. सावदीन तीन विकेटी घेतल्यो. बोल्टान श्रेयसाची विकेट घेतली.
न्यूझिलंडाचो डाव गडगडलो
39 धांवड्यांत डेव्होन कॉनवे (13) आनी रचीन रवींद्र (13) बाद जाल्ल्यान न्यूझिलंडाक भारताचें आव्हान पेलचें ना अशें दिसतालें. मात कॅप्टन केन विलियमसन आनी डेरील मिचेलान तिसरे विकेटी खातीर 181 धांवड्यांची भागिदारी करून डाव साल्वार करून जैताची आस्त तयार केली. पूण मोहम्मद शमीन तांची वाट आडायली. ह्या दोगांकूय आवट करून ताणे भारताची जैताची वाट मेकळी केली. विलियमसनान 9 चौके आनी एकासक्यान 69 धांवड्यो केल्यो. मिचेलान 9 चौके आनी 7 सक्यांनी 119 बॉलांत 134 धांवड्यो केल्यो. न्यूझिलंडाच्यो पयल्यो 5 विकेटी घेवपी शामी न्यूझिलंडाचो कर्दनका थारलो.
ग्लेन फिलिप (41) सोडल्यार न्यूझिलंडाचे बाकीचे पांच बॅट्समन दोन आंकडी धांवड्यो करपाक शकले नात. फिलिपाक बूमराहान कॅच आवट केलें मोहम्मद सिराजान सेंटनराची विकेट काडल्या उपरांत न्यूझिलंडाचो डाव गुठलावपाचें काम शामीन केलें. 48.5 ओव्हरींत तांणी 327 धांवड्यो केल्यो आनी 70 धांवड्यांनी तांका हार खावची पडली. शामीन 9.5 ओव्हरींत 57 धांवड्यांत 7 विकेटी घेवपाचो म्हा पराक्रम करून दाखयलो. बुमराह, सिराज आनी कुलदीप यादवाक दरेकी एक विकेट मेळ्ळी. दक्षीण आफ्रिका आनी ऑस्ट्रेलिये मजगतीं दुसरी सेमी फायनल जातली आनी फायनलींतलो भारताचो प्रतिस्पर्धी कोण हें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
