भांगरभूंय | प्रतिनिधी
खबरां संस्था
हॅमिल्टनः भारत आनी न्यूझिलंड हांचे मदली सेडॉन पार्क स्टेडियमा वयली दुसरी वन-डे मॅच पावसाक लागून निमाणे रद्द करची पडली. न्यूझिलंडाचो कॅप्टन केन विलियम्सान टॉस जिखून भारताक पयलीं खेळपाक सांगलें. मॅच रद्द केल्ली तेन्ना भारतान 12.5 ओव्हरींत ओपनर शिखर धवनाक वोगडावन 89 धांवड्यो केल्ल्यो. सूर्यकुमार यादव 34 आनी शुभमन गील 45 धांवड्यांचेर खेळटालो. ही मॅच हारल्यार भारत माळ हारपाची भिरांत आशिल्ली. आतां माळेचो निकाल तिसरे वन-डेंत लागतलो.
दोनूय पंगडांनी आपापल्या पंगडांत बदल केल्लो. न्यूझिलंडान दुखापत जाल्ल्या अॅडम मिल्नेचे सुवातेर मायकेल ब्रेसवेलाक सुवात दिली. भारतान आपल्या पंगडांत दोन बदल केल्ले. संजू सॅमसनाचे सुवातेर अश्टतासी दीपक हुडाक आनी शार्दुल ठाकूराचे सुवातेर दीपक चहराल संद दिल्ली. शार्दूलाक फाटीचो त्रास जातालो. ताका लागून चहराक खेळोवपाचो निर्णय पंगड वेवस्थापनान घेतिलो
मॅच सुरू जावचे पयलीं सेडॉन पार्काचेर खूब पावस पडून ते ओलें जाल्लें. ताका लागून टॉस उडोवपा लेगीत कळाव जालो. 15 मिनटां उसरां खेळ सुरू करचो पडलो. पांच ओव्हरी उपरांत परत पावस पडपाक लागलो. ताका लागून सुमार तीन वरां खेळ थांबोवचो पडलो. ताका लागून अंपायरांनी मॅच 29-29 ओव्हरींची केल्ली. पंगडाच्या 25 धांवड्यो जाल्ल्यो तेन्ना कॅप्टन शिखर धवन आवट जालो. सूर्यकुमार यादव आनी शुभमल गिलान 66 धांवड्याची भागिदारी केली. भारताच्यो 89 धांवड्यो जाल्ल्यो तेन्ना पावसाक परत सुरवात जाली आनी निमाणे मॅच रद्द करपाचो निर्णय घेतलो. फाटल्या शुक्राराक जाल्ले पयले वन-डेंत न्यूझिलंडान भारताक 7 विकेटींनी हारयल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
