भांगरभूंय | प्रतिनिधी
भारताचो पंगड वर्साचे अखेरेक पांच टॅस्टींची माळ खेळपाक ऑस्ट्रेलियेचे भोंवडेर वचपाचो आसा. हे भोंवडेचें वेळापत्रक काल जाहीर जालें. पयली मॅच 22 नोव्हेंबराक पर्थ शारांत जातली. जाल्यार माळेंतली निमाणी मॅच 3 जानेवारी सावन सिडनींत सुरू जातली.
हे माळेचें खाशेलपण म्हणल्यार वट्ट 32 वर्सां उपरांत भारत आनी ऑस्ट्रेलिया ह्या पंगडां मदीं पांच मॅचींची टॅस्ट माळ जाता. हाचे आदीं म्हणल्यार 1991-92त दोनूय पंगडां मदीं पांच टॅस्टींची माळ जाल्ली. त्या वेळार भारताक 0-4 अशा फरकान हार घेवची पडिल्ली.
फाटल्या 10 वर्सां सावन भारताचो पंगड ऑस्ट्रेलिये आड एकूय टॅस्ट माळ हारूंक ना. ऑस्ट्रेलियेंत दोन खेपे आनी घरच्या मैदानाचेर ताका दोन खेपे हारयला. दरेक खेपे भारताचें जैताचें अंतर 2-1 अशें आशिल्लें.
क्रिकेट ऑस्ट्रेलिया (सीए) हाणें मंगळार 2024-25चें वेळापत्रक जाहीर केलें. 22 नोव्हेंबरा सावन पयली टॅस्ट सुरू जातली. ते उपरांत 6 डिसेंबरा सावन अॅडिलेडांत दुसरी टॅस्ट सुरू जातली. ही डे नायट आसतली. ते उपरांत ब्रिस्बनाच्या गाबा मैदानाचेर 14 डिसेंबरा सावन तिसरी टॅस्ट सुरू जातली आनी मॅलबॉर्नांत 26 डिसेंबरा सावन चवथी मॅच जातली. पांचवी आनी निमाणी मॅच 3 जानेवारी 2025 सावन सिडनींत खेळयतले.
भारता खेरीत पाकिस्तान लेगीत तीन वन डे, तीन टी-20ची माळ खेळपाक ऑस्ट्रेलियेक वतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.