भांगरभूंय | प्रतिनिधी
पणजी ः गोंयची एक नामनेची प्रकाशन संस्था बिम्ब प्रकाशन, दर्जेदार पुस्तकां उजवाडाक हाडपा वांगडाच बिम्ब हें कोंकणींतलें एक लोकप्रिय मासिक फाटलीं 22 वर्सां नेमान चलयता. 2021 वर्सा सावन हे संस्थेन नामनेचे सुटकेझुजारी आनी ज्येश्ठ लेखक तशेंच पत्रकार गुरुनाथ केळेकार हांचे विनवणे वयल्यान ‘बिम्ब अस्तुरी पुरस्कार’ येवजण आंतरराष्ट्रीय महिला दिनाच्या निमतान चालीक लायल्या. केळेकार हांचे निमणे इत्सेक मान दिवन 2021 सावन बिम्ब प्रकाशनान बिम्ब अस्तुरी पुरस्काराची संकल्पना राबोवन, गोंयच्या रासवळ तशेंच साहित्य, कला आनी हेर साबार मळांचेर योगदान दिवपी अस्तुरेची ह्या पुरस्कारा पासत वेंचून काडपाक आरंब केला.
फाटल्या वर्सा 2021 वर्साच्या पुरस्कारा पासत समाजसेवा, चित्रपट निर्मिती तशेंच नाटकाच्या मळाचेर योगदान दिल्ल्या डॉ. प्रमोद दिलीप साळगांवकार हांकां वेंचून काडिल्ली. 2022 वर्साच्या पुरस्कारा पासत बिम्ब मासिकाच्यो संस्थापक पालवी संपादक, सामाजीक वावुरपी, लेखिका आनी रंगकर्मी प्रशांती तळपणकार हांकां जाल्यार 2023 वर्सा नामनेची अभिनेत्री, समाज वावुरपी आनी लेखिका डॉ, मिनाक्षी मार्टीन्स हांकां हो सन्मान फावो जाल्लो. ह्या वर्सा 2024 बिम्ब अस्तुरी पुरस्कारा पासत नामनेची समाजसेविका आनी लेखिका भारती बांदोडकार हांची एकमतान निवड जाल्या.
गोंयचे भुंयेर कितल्योच अस्तुऱ्यो आपले तांकी प्रमाण वेगवेगळ्या मळांचेर सामाजीक योगदान दितात. हातूंतल्या कितल्याच अस्तुऱ्यांक बिम्ब मासिकान प्रोत्साहन दिवन साहित्याच्या मळार उर्बा दिल्या जांची आज कवी, लेखक म्हूण ह्या मळार खाशेली सुवात आसा. पूण साहित्या वांगडाच हेर मळार वावुरपी कर्तृत्वी अस्तुऱ्यांची फावो तशी दखल घेवप जायना. तेच पासत आंतरराष्ट्रीय महिला दिनाच्या निमतान ह्या अस्तुऱ्यां मदल्यान त्या त्या वर्सा बिम्ब अस्तुरीची निवड करून तांचो भोवमान करपाचो हावेस आसा. मानपत्र, यादस्तीक आनी रु. 25 हजार रोख असो हो पुरस्कार शेनवार 11 मे दिसा एका खास दबाज्यांत भेटयतले अशें बिम्ब प्रकाशनान कळीत केलां.
ओंदुच्या बिम्ब अस्तुरी पुरस्काराच्यो मानेली भारती बांदोडकार हांकां ह्या आदीं मित्रा बीर पुरस्कार, गोंय सरकारचो यशोदामिनी पुरस्कार, श्रीमती वत्सलाताई वैद्य स्मृती पुरस्कार अश्या साबार पुरस्कारांनी भोवमानीत जाल्ल्यो आसात. तांणी अस्तुऱ्यांच्या प्रस्नांचेर मराठी तशेंच कोंकणींतल्यान चार पुस्तकां बरयल्यांत. पिसफूल सोसायटी ही संस्था स्थापन करून तांणी 1985 वर्सा सावन अस्तुऱ्यांचे प्रस्न घेवन आपल्या सामाजीक वावराक आरंभ केलो. गांवगिऱ्या अस्तुऱ्यांची आर्थिक सर्व्हे करून तांच्या जिविताचो स्तर वाडोवपा पासत आपरोजगार येवजण, भलायकी शिबिरां, शिवण प्रशिक्षण. कला- कुशळताय उदरगत,सोलर कुकर,अळमी लागवड, पोरसूं प्रशिक्षण, वखदी वनस्पती जतन, व्यसनमुक्ती शिबीर अश्या कितल्याच मळांचेर तांचो वावर आजून चालू आसा. बिम्ब मासिकांतलें तांचें सदर लोकप्रिय थारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
