भांगरभूंय | प्रतिनिधी
अॅड. देविदास पांगमः लिब्रा सोशियो लिगल ट्रस्ट संस्थेन मनयलो संस्थापक दीस
भांगरभूंय । प्रतिनिधी
म्हापशें: मुळावे हक्क आनी आपली लागणूक वेगळी करून चलचें ना. कारण ते दोनूय समसमान आसात. घटनेक पाळो दिवप आमची जापसालदारकी आसा, अशें गोंयचे अॅडव्होकेट जनरल देविदास पांगम हांणी सांगलें.
म्हापश्यां लिब्रा सोशियो लिगल ट्रस्ट संस्थेच्या संस्थापक दिसाचे कार्यावळींत अॅड. पांगम मुखेल सोयरे म्हूण उलयताले. ह्या वेळार प्रशासकीय लवादाचे आदले अध्यक्ष अध्यक्ष अॅड. राजेश नार्वेकार, ट्रस्टची अध्यक्ष अॅड. सिध्दी पारोडकार, सचीव अॅड. वल्लभ पांगम आनी मुखेल संस्थापक शिरीश दिवकार हाजीर आशिल्ले.
अॅड. पांगम हांणी सांगलें, लिब्रा सोशियो लिगल ट्रस्ट ही एकसुरी संघटणा समाजांतल्या लोकांक फुकट कायदो सल्लो दिवपी विश्वस्त मंडळ म्हापश्यां वावर करता. हाचें स्रय हे संघटणेचे सगळे पदाधिकारी आनी वांगड्यांक वता. गरजवंतांनी ह्या विश्वस्त मंडळांतल्या वकिलांचो सल्लो गेवन आपल्यो समस्या सोडोवच्यो, अशें तांणी सांगलें.
भारतीय घटणेचे निर्मितींत खूबश्या विद्वानांनी हे खातीर योगदान दिलां. अमेरिका, ऑस्ट्रेलिया, कॅनडा आनी हेर देशांच्या घटणांचो अभ्यास करून मसुदो तयार केलो. ब्रिटिशांनी इंडिया अॅक्ट 1935 हाडिल्ल्या कायद्यांचो ताका मूळ आदार आसा, अशें अॅड. पांगम हांणी सांगलें.
ह्या वेळार अॅड. राजेश नार्वेकार हांचो सत्कार अॅड. पांगम हांचे हस्तुकीं जालो. तशेंच संस्थे खातीर रातदीस काम करपी शिरीश दिवकार, अॅड. सिध्दी पारोडकार, अॅड. सोमनाथ कर्पे, अॅड. वल्लभ पांगम, अॅड. परी काटकार, अॅड. प्रणिता कर्पे आनी अॅड. आनंद शिरोडकार हांचो भोवमान केलो. शिरीश दिवकार आनी पद्मजा दिवकार हांणी आपलें कार्यालय ट्रस्टा खातीर दिल्ल्याचें घोशीत केलें. अॅड. सिध्दी पारोडकार हांणी येवकार दिलो आनी सुत्रसंचालन केलें. गिरीश दिवकार हांणी सोयऱ्यांची वळख करून दिली जाल्यार प्रणिता कर्पे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.