भांगरभूंय | प्रतिनिधी
नॉर्वे बुद्दीबळ सर्तीचे सवे फेरयेंत हारीचे धपके बसल्या उपरांत, भारताच्या ग्रॅण्डमास्टरांनी सातवे फेरयेंत जबरदस्त पुनरागमन केलें. अटीतटीचे लडतींत आर. प्रज्ञानंदान फ्रान्सच्या अलीरेजा फिरोजाक हारोवन पूर्ण तीन गूण मेळयले, दुसरे वटेन संवसारीक वस्ताद डी. गुकेशान अमेरिकेच्या वॅस्ली सॉ आडची क्लासिकल मॅच बादाबाद उरल्या उपरांत आर्मागेडन टायब्रेकरांत जैत जोडून 1.5 गूण मेळयले. बायलांच्या गटांत दिव्या देशमुखान लेगीत उत्कृश्ट कामगिरी करीत आपलें वस्तादपणाचें आव्हान कायम राखलें.
उक्त्या गटांत आर. प्रज्ञानानंदान धव्या घुलांनी खेळटना सुरवाती सावन आक्रमक भुमिका घेतली. ताणें 26वे चालीचेर मॅची वयली आपली पकड घटमूट केली आनी फिरोजाक सेगीत दुसरे क्लासिकल मॅचींत हारयलो. ह्या जैता उपरांत प्रज्ञानानंदाच्या खात्यांत आतां 9 गूण जाल्यात आनी तो तिसरे सुवातेर पावलो.
गुकेशाक वेस्ली सॉ आड क्लासिकल मॅचींत जैताची भांगराळी संद आशिल्ली. पूण, वॅस्लीन अचूक बचाव केल्ल्यान मॅच बादाबाद उरली. ते उपरांत जाल्ल्या टायब्रेकरांत गुकेशान जैत जोडून 1.5 गूण आपल्या नांवार केले. गुकेशाचे आतां वट्ट 8 गूण जाल्यात आनी तो गुणतकट्यांत निमाणे सुवातेर आसा. पूण, ताचें आव्हान अजून कायम आसा.
बायलांच्या गटांत दिव्या देशमुखान आपलो उत्कृश्ट फॉर्म कायम राखलो. सातवे फेरयेंत तिणें आपल्याच देशाचे कोनेरू हम्पीक आर्मागेडन टायब्रेकरांत हारोवन 10 गुणां सयत दुसरी सुवात मेळयली. पूण, कझाकस्तानाची बिबिसारा असाउबायेवा 12. 5 गुणां सयत पयले सुवातेर कायम आसा. बिबिसारान सातवे फेरयेंत चीनाचे झू जिनराक क्लासिकल मॅचींत हारयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
