भांगरभूंय | प्रतिनिधी
खबरां संस्था
नवी दिल्लीः भारतान इग्लंडा आडची पांच टॅस्ट मॅचींची माळ 4-1 अशी जिखून व्हडलो फायदो जाला. ह्या जैताक लागून रोहीत शर्माचो भारतीय पंगड आससीसीचे टॅस्ट क्रमवारींत पयले सुवातेर पावला. हाचे पयलीं टी-20 आनी वन-डेंत अव्वल आशिल्लो. अशें तरेन भारतान एकाच वेळार तिनूय फॉरमेटांत पयलो नंबर मेळयला. हाचे पयलीं डिसेंबरांत भारतीय पंगडान अशी कामगिरी केल्ली. आतां परत एक फावट तिनूय फॉरमेटांत पयलो नंबर मेळयतनाच वर्ल्ड टॅस्ट चॅम्पियनशीप क्रिकेटीत (डब्ल्यूटीसी) पयली सुवात मेळोवपाच इतिहासीक कामगिरी केल्या.
टी-20 त पयली सुवात मेळयल्या उपरांत दक्षीण आफ्रिके आडची वन-डे माळेंत 2-1 अशें जैत मेळल्या उपरांत वन-डे क्रिकेटींत पयली सुवात मेळयल्ली. दक्षीण आफ्रिके आडची टॅस्ट माळ 1-1 अशी बरोबरींत सुटल्ल्यान भारताचें टॅस्ट क्रिकेटींतली पयली सुवात हातांतल्यान गेल्ली. तेन्ना ऑस्ट्रेलियन पंगड पयले सुवातेर आयिल्लो. आतां विशाखापट्टणम, राजकोट , रांची आनी धरमशाला टॅस्टींत इंगल्ंडाचेर जैत मेळयल्यान भारत परत टॅस्ट क्रमवारींत पयले सुवातेर आयला.
टॅस्ट क्रमवारींत भारताचे आतां 122 रेटींग गुण आसात. ऑस्ट्रेलिया 118 गुणानी दुसरे सुवातेर आसा. इंग्लंड 111 गुणांनी तिसरे सुवातेर आसा. आतां क्राईस्टचर्चांत न्युझिलंड आनी ऑस्ट्रेलिया हाचे मदले टॅस्ट मॅचीचो निकाल कसोय लागलो जाल्यार फरक पडचो ना आनी भारत टॅस्ट क्रमवारींत पयले सुवातेर उरतोलो. भारताचे वन-डे क्रमवारींत 121 रेटींग गुण आसात. 118 गुणांनी ऑस्ट्रेलिया दुसरे सुवातेर आसा. टी-2- क्रमवारींत भारताचे 266 रेंटींग गुण आसात. इंग्लंड 256 गुणांनी दुसरे सुवातेर आसा. भारत 68.51 गुणाचे टक्केवारीन आयसीसी डब्ल्यूटीसी क्रमवारींत पयसे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
