भारता कडल्यान जर्मनीक हारीचो धपको

भांगरभूंय | प्रतिनिधी

स्ट्रायकर सुखजीत सिंगान दुसऱ्या अर्दांत केल्ल्या दोन गोलांच्या नेटार एफआयएच प्रो लीग हॉकी सर्तीचे पयले मॅचींत संवसारीक वस्ताद जर्मनी पंगडाक 3-2 गोल फरकांनी हारोवन सगल्यांक अजापाचो धपको दिलो.

संवसारीक सर्तींतले निर्शेणी हाडपी अभियाना उपरांत भारताची ही पयली मॅच आशिल्ली. संवसारीक सर्तीचे प्री क्वॉर्टरफायनलींत हारल्या उपरांत साबार खेळगड्यांक पंगडांतल्यान भायर बसयिल्ले. पूण, 26 वर्सां पिरायेचो सुखजीत पंगडांत कायम उरिल्लो. ताणें 31व्या आनी 42व्या मिनटाक मैदानी गोल केले.

सर्तींत आतां मेरेन जोड रितीन पयले सुवातेर आशिल्ल्या मुखेली हरमनप्रीत सिंगान बिरसा मुंडा स्टेडियमाचेर 30व्या मिनटाक गोल केलो. संवसारीक हॉकी सर्तींत हरमनप्रीताक बरें प्रदर्शन करपाक जमूंक नाशिल्लें. भारतान 42व्या मिनटा मेरेन 3-0 अशी आघाडी घेतिल्ली. ते उपरांत जर्मनी वतीन पॉल फिलीप कॉफमॅन आनी मायकल स्ट्रुथॉफ हांणी वळेरेन 44व्या मिनटाक आनी 57व्या मिनटाक गोल केले. संवसारीक सर्तींत खेळपी चडशे खेळगडे हे मॅचींत खेळ्ळे. तांकां पॅनल्टी कॉर्नराचेर गोल करपाक ते संघर्श करतना दिसले. जर्मनीक स पॅनल्टी कॉर्नर आनी भारताक चार पॅनल्टी कॉर्नर मेळ्ळे.

जर्मनीन मॅचीक बरी सुरवात केली. 10व्या मिनटांत सेगीत पांच पॅनल्टी कॉर्नर मेळयले. पूण, भारतान संयम राखतना बरे तरेन बचाव केलो. दुसऱ्या क्वॉर्टराचे अखेरेक स्ट्रायकर अभिषेकान सर्कलांत केल्ल्या यत्नांक लागून भारताक लय मेळ्ळी. ते पयलीं गुरजांत सिंग आनी दिलप्रीत सिंग हांचे यत्न जर्मनीचो गोलकीपर एलेक्झेंडर स्टॅण्डलर हाणें अपेशी केल्ले. मध्यांतराक कांय मिनटां बाकी आसतना भारताक पयलो पॅनल्टी कॉर्नर मेळ्ळो. हरमनप्रीतान उत्कृश्ट यत्ना वरवीं आपल्या पंगडाक 1-0 अशी आघाडी मेळोवन दिली.

संवसारीक सर्ती उपरांत हॉकी इंडियान मुखेल प्रशिक्षक ग्रॅहम रिडाक पदा वयल्यान काडिल्लो. पूण, हरमनप्रीताचें मुखेलपद कायम दवरिल्लें. एका गोलाची आघाडी घेतल्या उपरांत भारताचो आत्मविस्वास बरोच वाडलो. भारतान हो आत्मविस्वास तिसऱ्या क्वॉर्टरांत पळोवपाक मेळ्ळो. 31व्या मिनटाक सुखजीतान गोल करून भारताक 2-0 अशी आघाडी मेळोवन दिली. 11 मिनटां उपरांत सुखजीतान परतून गोल केलो.

तीन गोलांनी फाटीं पडिल्ल्या जर्मनीन हार मानूंक ना. तिसऱ्या क्वॉर्टराचे अखेरेक पॉल फिलिपान गोल केलो. मॅचीच्या अखेरच्या खिणाक भारतान रक्षात्मक खेळ केलो. ताका लागून जर्मनीन आपल्या गोलकिपराक भायर काडून एक अतिरिक्त खेळगड्याक आपल्या आक्रमणांत सामील केलो. मॅच सोंपपाक दोन मिनटां बाकी आसतना जर्मनीन आपलो दुसरो गोल केलो.

मॅचीच्या निमाण्या खिणाक भारताक पॅनल्टी स्ट्रोक मेळिल्लो. पूण, हरमनप्रीताक गोल करपाक जमलो ना. अखेरेक भारताक 3-2 अशा फरकान जैत फावो जालें. भारत आपली फुडली मॅच आयज ऑस्ट्रेलिये आड खेळटलो.