भांगरभूंय | प्रतिनिधी
अमेरिका आनी कॅरिबीयन जुव्यांचेर जावपी संवसारीक टी-20 क्रिकेट सर्ती खातीर भारताच्या पंगडाची घोशणा केली. रोहीत शर्माच्या फुडारपणाखाला भारत 17 वर्सां सावन चालू आशिल्लो दुकळ सोंपोवपाच्या यत्नांत आसतलो. 15 वांगड्यांच्या पंंगडाचें उप मुखेलीपद हार्दीक पांड्या कडेन आसतलें.
पंगडांत ऋषभ पंत, संजू सॅमसन, शिवम दुबे आनी युजवेंद्र चहल हांचो आस्पाव केला.
चहलाक दक्षीण आफ्रिकेंत जाल्ले टी-20 माळे खातीर पंगडांत सुवात मेळूंक नाशिल्ली. तशेंच वर्साचे सुरवातीक अफगाणिस्ताना आड भारतांत जाल्ले माळेंत लेगीत ताचो विचार जावंक नाशिल्लो. पूण, अंदूंच्या आयपीएलांत ताचो फॉर्म पळोवन निवड समितीन ताका राष्ट्रीय पंगडांत सुवात दिल्या.
2022त ऑस्ट्रिलयेंत जाल्ले संवसारीक टी-20 सर्तींत वांटो घेतिल्ल्या भारताच्या पंगडांत ताचो आस्पाव आशिल्लो. पूण, ताका एक लेगीत मॅच खेळपाची संद मेळूंक नाशिल्ली. चहला खेरीत रवींद्र जडेजा, कुलदीप यादव आनी अक्षर पटेल हांच्या रुपान तीन स्पिनर पंगडांत आसात.
डिसेंबर 2022त ऋषभ पंताक भिरांकूळ मोटार अपघात जाल्लो. तेन्ना सावन पंतान एक लेगीत आंतरराष्ट्रीय टी-20 मॅच खेळूंक ना. पूण, अंदूंच्या आयपीएलांत ताणें 11 डावांनी 158.56चे स्ट्रायक रेटीन 398 धांवड्यो केल्यात. सॅमसंगाची ही पयली संवसारीक सर्त आसतली. 2022त निवड समितीन दिनेश कार्तिकाचो पंगडांत आस्पाव केल्ल्यान सॅमसनाक पंगडांत सुवात मेळूंक नाशिल्ली. पूण, पंता भशेन सॅमसनान लेगीत आयपीएलांत धांवड्यांचो पावस घाला.
सॅमसन सध्या आयपीएलांत राजस्थान रॉयल्साचो मुखेली आसा. सध्या ताचो पंगड गुणतकट्यांत पयले सुवातेर आसा. सॅमसनान णव डावांनी 161.08चे स्ट्रायक रेटीन 385 धांवड्यो केल्यात.
रोहीत शर्मा वांगडा पंगडांत दुसरो अणभवी बॅट्समन विराट कोहली आसा. रोहीता वांगडा यशस्वी जयस्वाल डावाची सुरवात करतलो. 15 वांगड्यांच्या पंगडांत पांच बॅट्समन, दोन विकेटकीपर, दोन फास्ट बॉलर अश्टतांसी, दोन स्पिनर अश्टतांसी, दोन मुखेल स्पिनर आनी फकत तीन फास्ट बॉलर आसात.
राखीव खेळगड्यां मदीं दोन फास्ट बॉलर आसात. जाल्यार रिंकू सिंग आनी शुभमन गील हांकां राखीव बॅट्समन म्हणून पंगडांत सुवात दिल्या.
पंगडा संबंदी म्हत्वाची गजाल म्हणल्यार विकेटकीपर बॅट्समन लोकेश राहुलाक सुवात मेळूंक ना. आयपीएलांत लखनौ सुपर जायण्ट्साचें फुडारपण करपी राहुलान अंदूंच्या हंगामांतली सुरवात सामकी स्लो केल्ली. ताचे स्ट्रायक रेटी विशीं खूब चर्चा जाल्ली. पूण, उपरांत ताणें आपल्या खेळांत बरीच सुदारणां केली.
भारत आपली पयली मॅच 5 जूनाक आयर्लेण्डा आड खेळटलो. जाल्यार 9 जूनाक भारताची मॅच पाकिस्ताना आड जातली.
संवसारीक टी-20 सर्तीची सुरवात 2007त आफ्रिकेंत जाल्ली. त्या वेळार पाकिस्तानाक हारोवन भारतान वस्तादपण जोडिल्लें. पूण, ते उपरांत भारताक एकदाय सर्त जिखपाक जमूंक ना. 2014त जाल्ले सर्तीचे फायनलींत पाविल्लो. पूण, त्या वेळार ताका श्रीलंके कडल्यान हार घेवची पडिल्ली. 2016 आनी 2022चे सेमी फायनलींत पाविल्लो. पूण, त्या वेळार ताका वळेरेन वॅस्ट इंडिज आनी इंग्लंडा कडल्यान हार घेवची पडिल्ली.पंगडः रोहीत शर्मा (मुखेली), हार्दीक पांड्या (उप मुखेली), यशस्वी जयस्वाल, विराट कोहली, सुर्यकुमार यादव, ऋषभ पंत (विकेटकीपर), संजू सॅमसन (विकेटकीपर), शिवम दुबे, रवींद्र जाडेजा, अक्षर पटेल, कुलदीप यादव, युजवेंद्र चहल, अर्शदीप सिंह, जसप्रीत बुमराह, मोहम्मद सिराज
राखीव – शुभमन गील, रिंकू सिंग, ख़लील अहमद, आवेश खान
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.