भांगरभूंय | प्रतिनिधी
ऑस्ट्रेलियेच्या बायलांच्या पंगडान दुसरे वन डे मॅचींत येजमान भारताच्या बायलांच्या पंगडाक तीन विकेटींनी हारयलो. ह्या जैता सयत ऑस्ट्रेलिया पंगडान तीन वन डे मॅचींचे माळेंत 2-0 अशी आघाडी घेतली. पयली मॅच ऑस्ट्रेलियेन 6 विकेटींनी जिखिल्ली.
हांगाच्या वानखेडे स्टेडियमाचेर जाल्ले मॅचींत ऑस्ट्रेलिया पंगडान टॉस जिखून पयलीं बॅटींग करपाचो निर्णय घेतलो आनी निर्धारीत 50 ओव्हरींनी 8 विकेटी वगडावन 258 धांवड्यो केल्यो. ताका जाप दितना भारताक 50 ओव्हरींनी 8 विकेटी वगडावन 255 धांवड्यो करप शक्य जाल्यो.
फीब लीचफिल्ड (63), एलिस पेरी (50) हाणें अर्द शेंकड्याची खेळी केली. जाल्यार एनाबेल सदरलॅण्डान 3 विकेटी घेतल्यो. भारता वतीन दीप्ती शर्मान पांच विकेटी घेतल्यो, जाल्यार ऋचा घोषाक (96) चार धांवड्यांनी शेंकडो चुकलो. माळेंतली तिसरी आनी निमाणी मॅच 2 जानेवारीक जातली. ते उपरांत तीन मॅचींची टी-20 माळ जातली.
ऑस्ट्रेलियेच्या डावाची सुरवात मुखेली एलिसा हिली आनी फीब लीचफिल्ड हाणें केली. हिली 13 धांवड्यो करून तंबूंत परतली. तिका पुजा वस्त्रकरान बाद केली. तिसरे सुवातेर एलिस पेरी आयली. तिणें फीब हिच्या वांगडा मेळून डाव सांबाळ्ळो. दोगांयनी दुसरे विकेटी खातीर 77 धांवड्यांची भागिदारी केली. 24वे ओव्हरींत दिप्ती शर्मान पेरीक बाद करून ही भागिदारी फोडली. पेरीन 50 धांवड्यो केल्यो.
तिसरी विकेट बेथ मुनीच्या रुपान पडली. तिका फकत 10 धांवड्यो करप शक्य जाल्यो. फीब 98 बॉलांनी 63 धांवड्यो करून बाद जाली. ते उपरांत ऑस्ट्रेलियेचे एकेय खेळगडयेक व्हड भागिदारी करपाक जमली ना.
ताहलिया मॅक्ग्रान 24, एश्ले गार्डनरान 2, एनाबेल सदरलॅण्डान 23 आनी जॉर्जिया वेयरहमान 22 धांवड्यो केल्यो. एलाना किंग हिणें अखेरच्या ओव्हरींनी कांय आक्रमक शॉर्ट खेळून 17 बॉलांनी 28 धांवड्यो केल्यो. किम गार्थान नाबाद 11 धांवड्यांची खेळी केली.
भारता वतीन दिप्ती शर्मान 5 विकेटी घेतल्यो. तिचे खेरीत पुजा वस्त्रकर, श्रेयांका पाटील आनी स्नेह राणा हिणें एकेक विकेट मेळयली.
मोखीचो फाटलाव करपी भारताची सुरवात बरी जाली ना. यास्तिका भाटिया आनी स्मृती मंधाना हांणी डावाची सुरवात केली. भाटिया 14 आनी मंधाना 34 धांवड्यो करून तंबूंत परतली. तिसरे सुवातेर आयिल्ले ऋचा घोष आनी चवथे सुवाते वयले जेमिमा रॉड्रिग्स हिणें पंगडाचो डाव सांबाळ्ळो. दोगांयनी 88 धांवड्यांची भागिदारी केली. जेमिमा 44 धांवड्यो करून बाद जाली. हांगाच्या भारताचो डाव गडगडलो. मुखेली हरमनप्रीत कौर 5 धांवड्यो करून बाद जाली. हांगाच्यान दिप्ती शर्मान ऋचाक बरी साथ दिली. दोगांयनी 47 धांवड्यांची भर घाली. ही जोडी भारताक जैताच्या लागसार व्हरतली अशें दिसता आसतना ऋचा 96 धांवड्यांचेर बाद जाली. हांगाच्यान मोख मेळोवप भारता खातीर कठीण जालें. अमनजोत कौर 4 धांवड्यो करून बाद जाली. ते उपरांत थारावीक अंतरान विकेटी पडत गेल्यो.
ऑस्ट्रेलिये वतीन एनाबेल सदरलॅण्डान तीन, जॉर्जिया वेयरहमान 2 आनी एलाना किंग, एश्ले गार्डनर आनी किम गार्थ हाणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
