भांगरभूंय | प्रतिनिधी
भारत आनी येजमान न्युझिलॅण्ड ह्या पंगडां मदली वन डे माळेंतली तिसरी आनी निमाणी मॅच पावसाक लागून रद्द करची पडली. अशे तरेन न्युझिलॅण्डान तीन मॅचींची माळ 1-0 अशा फरकान जिखली.
भारतान पयलीं बॅटींग करतना येजमान पंगडा मुखार जैता खातीर 220 धांवड्यांची मोख दवरिल्ली. प्रत्युत्तर दितना न्युझिलॅण्डान 18 ओव्हरींनी एक विकेट वगडावन 104 धांवड्यो केल्ल्यो. पूण, ते उपरांत पावस आयलो आनी खेळ मुखार जावपाक पावलो ना. मैदान वलें जाल्ल्यान अंपायरांनी मॅच रद्द करपाचो निर्णय घेतलो.
न्युझिलॅण्डा वतीन ओपनर फिन अॅलनान 54 बॉलांनी आठ चवके आनी एका सक्याचे मजतीन 57 धांवड्यो केल्यो. जाल्यार डॅव्हन कॉनवेन 51 बॉलांनी स चवक्यांचे मजतीन नाबाद 38 धांवड्यो केल्यो.
ते पयलीं न्युझिलॅण्डाच्या बॉलरांनी भारताचो डाव 47.3 ओव्हरींनी 219चेर सोंपयलो. टॉस हारल्या उपरांत पयलीं बॅटींग करपी भारताची सुरवात खाशेली अशी जावंक ना. शिखर धवन आनी शुभमन गिल हे जोडयेन संथ सुरवात केली पूण, व्हड भागिदारी करपाक जमली ना. गिलान 22 बॉलांनी 13 धांवड्यो करून बाद जाल्यो. त्या वेळार पंगडाची धांवसंख्या 39 आशिल्ली. ते उपरांत भारतान थारावीक अंतरान विकेटी वगडायल्यो. मुखेली धवन 28, ऋषभ पंच 10 आनी सुर्यकुमार यादव 6 धांवड्यो करून बाद जालो.
मजगतीं, श्रेयस अय्यरान एक बाजू सांबाळून धरतना 59 बॉलांनी 49 धांवड्यो केल्यो. अखेरच्या ओव्हरींनी वॉशिंग्टन सुंदराच्या 64 बॉलांनी 51 धांवड्यांची खेळी करून पंगडाचो स्कोर 200 वयर पावयलो. दीपक हुड्डा आनी दीपक चहर हांणी दरेकी 12 धांवड्यो केल्यो.
न्युझिलॅण्डा वतीन अॅडम मिल्न आनी डॅरेल मिशेल हांणी दरेकी तीन विकेटी घेतल्यो. लॉकी फर्ग्युसन आनी मिचेल सॅंटनर हांणी दरेकी एक विकेट घेतली.
न्युझिलॅण्डान पयली मॅच सात विकेटींनी जिखिल्ली. जाल्यार दुसरी मॅच पावसाक लागून एकूय बॉल जावंक नाशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
