भांगरभूंय | प्रतिनिधी
येजमान भारतान रांची टॅस्टींत इंग्लंडाक 5 विकेटींनी हारयलो. काल चवथ्या दिसा भारतान जैता खातीर मेळिल्ली 192 धांवड्यांची मोख 5 विकेटी राखून मेळयली. ह्या जैता सयत भारतान पांच टॅस्टींचे माळेंत 3-1 अशी निर्णाय आघाडी घेतली. पांचवी आनी निमाणी मॅच 7 मार्चाक धर्मशाला मैदानाचेर सुरू जातली.
घरच्या मैदानाचेर भारतान सेगीत 17वी टॅस्ट माळ जिखली. ह्या जैतान वर्ल्ड टॅस्ट चॅम्पियनशिपीचे गुणतकट्यांत 64.58% गुणां सयत दुसरे सुवातेर पावलो. मुखेली बेन स्टोक्स आनी प्रशिक्षक ब्रॅण्डन मॅक्कलमाचे बॅझबॉल जोडयेची ही पयली टॅस्ट माळ हार थारली.
भारतान काल चवथ्या दिसा बिनबाद 40 धांवड्यां वयल्यान मुखार खेळपाक सुरवात केली. त्या वेळार भारताक जैता खातीर आनीक 152 धांवड्यांची गरज आशिल्ली. भारताचो मुखेली रोहीत शर्मान (55) आनी शुभमन गिलान (नाबाद 52) अर्द शेंकड्यांची खेळी केली. जाल्यार ध्रुव जुरेलान नाबाद 39 धांवड्यांचें योगदान दिलें. गिल आनी जुरेल हाणें नाबाद 72 धांवड्यांची भागिदारी केली.
इंग्लंडा वतीन शोएब बशीरान सगल्यांत चड 3 विकेटी घेतल्यो. टॉम हार्टले आनी जो रुट हाणें एकेक विकेट मेळयली.
मजगतीं, रोहीत शर्मा आनी यशस्वी जयस्वालान आक्रमक रितीन दिसाची सुरवात केली. रांचीची खेळपट्टी पयल्या दिसा सोडली जाल्यार पयल्या सत्रांत बॅट्समनांक मजत करताली. ताका लागून रोहीत आनी यशस्वी जे रितीन सकाळच्या सत्रांत खेळटाले, तें पळोवन भारत ही मॅच सहज जिखतलो अशें दिसतालें. पूण, फाटोफाट विकेटी पडिल्ल्यान क्रिकेट मोग्यांक हुस्को जालो. यशस्वीक जो रुटान बाद केलो. मुखेल रोहीत दुसरे वटेच्यान बाजू सांबाळून धरिल्ली. पूण, अर्द शेंकडो पुर्ण केल्या उपरांत क्रिजी भायर येवन मारपाच्या यत्नांत तो स्टम्प बाद जालो. त्या वेळार बॉल ताच्या बॅटाक लागून विकेटकीपराच्या हातांत घेल्लो. अखेरेक ताका कॅच बाद दिलो. भारताच्या हातांत आठ विकेटी आशिल्ल्यो. पूण, रजत पाटीदार बाद जाल्या उपरांत भारताचेर चेपण वाडलें. पूण, जेवणाच्या विसवा वयलीं रवींद्र जडेजान डाव सांबाळपाचो यत्न केलो. पूण, जेवणाच्या विसवा उपरांत शोएब बशीरान पयलीं जडेजाक आनी उपरांत सरफराज खानाक सेगीत दोन बॉलांचेर तंबूंत धाडले. जडेजा फूलटॉस बॉलाचेर जॉनी बॅयरस्टोच्या हातांत कॅच दिली. 120 धांवड्यांचेर अर्दो पंगड तंबूंत गेल्लो. भारताक ह्या वेळार जैता खातीर आनीक 120 धांवड्यांची गरज आशिल्ली. अशा वेळार गिल आनी जुरेल हाणें ल्हवल्हव करून भारताचो डाव मुखार व्हेलो. दोगूय एकेक धांवडेचेर भर दिताले. गिलान वैयक्तीक 40 धांवड्यो फकत एकोडी आनी दोट्टी धांवडी करून केल्ल्यो. ते उपरांत ताणें दोन सके मारून आपलो अर्द शेंकडो पुर्ण केलो. जुरेलान विनिंग शॉर्ट मारून भारताचें जैत निश्चीत केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
