भांगरभूंय | प्रतिनिधी
हॉकी इंडियान राष्ट्रकूल खेळां सर्ती खातीर काल भारताच्या दादल्यांच्या हॉकी पंगडाची घोशणा केली. टोकियो ऑलिम्पिकांत पंगडाचें फुडारपण करपी मनप्रीत सिंगाक परतून एकदा मुखेली केला.
ताच्याच फुडारपणाखाला भारतान 41 वर्सांनी ऑलिम्पिकांत पदक जिखिल्लें. पंगडांत टोकियो ऑलिम्पिकांत कांश्या पदक जिखपी पंगडांतल्या 11 खेळगड्यांक सुवात दिल्या. जाल्यार चार खेळगड्यांक भायर बसयल्यात.
अणभवी गोलकीपर पी आर श्रीजेश, कृष्ण बहादूर थापा हांणी दुखापतींतल्यान पुर्ण बरे जावन पंगडांत पुनरागमन केलां. निवड समितीन डिफॅन्स, मिड फिल्ड आनी फॉरवर्ड हातूंतल्या अणभवी खेळगड्यांक म्हत्व दिलां.
ड्रेगी फ्लिकर रुपिंदर पाल सिंगाक भायर बसोवपाचो निर्णय घेतला. ताणें आपले ड्रॅग फ्लिकाच्या नेटार संवसारांतल्या साबार गोलकिपरांक चकयल्यात. पूण, ताका दुखापतीक लागून भायर बसयला अशें निवड समितीन म्हणलां. आशिया करंड सर्ती पयलीं ताका दुखापत जाल्ली. ताका लागून रुपिंदराक संपुर्ण सर्त चुकिल्ली.
ताचे सुवातेर ड्रॅग फ्लिकर हरमनप्रीत सिंगाक संद दिल्या. हरमनप्रीतान एफआयएच प्रो हॉकी लिगेंत सगल्यांत चड गोल केल्ले. ताका उप मुखेली केला.
डिफॅन्साची जापसालदारकी वरुण कुमार, सुरेंद्र कुमार, हरमनप्रीत सिंग, अमीत रोहिदास, जुगराज सिंग आनी जरमनप्रीत सिंग हांचेर आसतली. मनप्रीत सिंग, हार्दिक सिंग, विवेक सादर प्रसाद, समशेर सिंग, आकाशदीप आनी नीलकांत शर्मा हांकां मिडफिल्डांत सुवात दिल्या. मनदीप सिंग, ललित कुमार उपाध्याय, गुरजंत सिंग आनी अभिषेक हांचो स्ट्रायकर म्हणून पंगडांत आस्पाव केला.
राष्ट्रकूल खेळां सर्त 28 जुलय ते 8 ऑगस्ट मेरेन बर्मिघमांत चलतली. भारताक ब गटांत दवरला. ह्या गटांत इंग्लंड, कॅनडा, वेल्स आनी घाना हे देश आसतले. भारताची पयली मॅच 31 जुलयाक घाना आड जातली. 2018त जाल्ले राष्ट्रकूल खेळां सर्तींत भारताक चवथे सुवातेर समाधान मानचें पडिल्लें.
2024 पॅरीस ऑलिम्पीक पात्रताय सर्त आशिल्ली हॅगझोऊ आशियायी खेळां सर्त आनी राष्ट्रकूल खेळां सर्त हांचे मदलो कालावधी उणो आशिल्ल्यान हॉकी इंडियान सुरवातीक राष्ट्रकूल खेळां सर्ती खातीर दुसऱ्या पांवड्याचो पंगड धाडपाचो निर्णय घेतिल्लो. पूण, चीनांत कोवीड-19ची स्थिती इबाडिल्ल्यान आशियायी खेळां सर्त मुखार धुकल्ली, ताका लागून राष्ट्रकूल खेळां सर्ती खातीर हॉकी इंडियान बळिश्ठ पंगड धाडपाचो निर्णय घेतलो.
पंगडः (गोलकीपर) पी आर श्रीजेश, कृष्ण बहादूर पाठक (डिफॅण्डर) वरुण कुमार, सुरेंद्र कुमार, हरमनप्रीत सिंग (उप मुखेली), अमीत रोहिदास, जुगराज सिंग, जरमनप्रीत सिंग, (मिड फिल्डर) मनप्रीत सिंग (मुखेली), हार्दिक सिंग, विवेक सागर प्रसाद, शमशेर सिंग, आकाशदीप सिंग, नीलाकांत शर्मा, (फॉरवर्ड) मनदीप सिंग, गुरजंत सिंग, ललित कुमार उपाध्याय आनी अभिषेक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
