भांगरभूंय | प्रतिनिधी
बायलांचे वन डे क्रिकेट सर्तींत ऑस्ट्रेलियेच्या पंगडान येजमान भारताक तिसरे वन डे मॅचींत 190 धांवड्यांनी हारयलो. अशे तरेन ऑस्ट्रेलियेन तीन मॅचींची माळ 3-0 अशा फरकान जिखून भारताचो धूप केलो. फाटल्या 12 वर्सांतलें भारताची ही व्हड हार आसा. हाचे पयलीं म्हणल्यार 2012त ऑस्ट्रेलियेच्याच पंगडान 221 धांवड्यांनी हारयिल्लो. बायलांच्या वन डे क्रिकेटीच्या इतिहासांतली ही व्हड हार आसा.
ऑस्ट्रेलियेचे फीब लीचफिल्डान 119 धांवड्यांची खेळी केली. तिणें दुसरे वन डे मॅचींत लेगीत शेंकडो मारिल्लो. तिच्या ह्या प्रदर्शनाक लागून तिची प्लेयर ऑफ द मॅच आनी प्लेयर ऑफ द सिरीज पुरस्कारा खातीर निवड जाली.
वानखेडे स्टेडीयमाचेर ऑस्ट्रेलियेन टॉस जिखून पयलीं बॅटींग करपाचो निर्णय घेतलो आनी निर्धारीत 50 ओव्हरींनी 7 विकेटी वगडावन 338 धांवड्यो केल्यो. 339 धांवड्यांचो फाटलाव करतना भारताचो डाव 32.4 ओव्हरींनी 148 धांवड्यांचेर सोंपलो.
भारतान डावाची सुरवात सादूरतायेन केल्ली. यास्तिका भाटीया आनी स्मृती मंधाना हे ओपनरांचे जोडयेन 32 धांवड्यांची भागिदारी केल्ली. त्या वेळार म्हणळ्यार पांचवे ओव्हरीच्या निमाण्या बॉलाचेर यास्तिका बाद जाली.
ही विकेट पडल्या उपरांत भारताचो डाव गडगडलो. यास्तिका (6) बाद जाल्या उपरांत, हरमनप्रीत कौर 3, अमनजोत कौर 3, श्रेयांका पाटील 2 आनी मन्नत कश्यप 8 सवाय भितर तंबूंत परतली. रेणुका सिंग ठाकूराक खातें लेगीत उगडपाक जमलें ना. जाल्यार मंधानान 29, जेमिमा रॉड्रिग्सान 25, ऋचा घोषान 19 आनी पुजा वस्त्रकरान 14 धांवड्यांचें योगदान दिलें.
दिप्ती शर्मा 39 बॉलांनी 25 धांवड्यो करून नाबाद उरली. ऑस्ट्रेलिये वतीन जॉर्जिया वेयरहमान 3 विकेटी घेतल्यो. एलाना किंग, एनाबेल सदरलॅण्ड आनी मेगन शट हिणें दरेकी 2 विकेटी मेळयल्यो. एश्ले गार्डनराक एक येस फावो जालें.
हे माळे उपरांत दोनूय पंगडां मदीं तीन मॅचींची टी-20 माळ जातली. पयली मॅच 5 जानेवारीक मुंबयच्या डी व्हाय पाटील स्टेडियमाचेर जातली. उरिल्ल्यो दोन मॅची वळेरेन 7 आनी 9 जानेवारीक जातल्यो.
ते पयलीं बॅटींग करपी ऑस्ट्रेलियेक एलिसा हिली आनी लीचफिल्ड हे जोडयेन बरी सुरवात करून दिली. दोगांयनी पयले विकेटी खातीर 189 धांवड्यांची भागिदारी केली. सुरवातीच्या 28 ओव्हरी मेरेन भारताक एकूय विकेट मेळूंक ना. 29वे ओव्हरींत पुजान हिलीक बोल्ड करून ही भागिदारी फोडली. हिली 82 धांवड्यो करून बाद जाली. ते उपरांत ऑस्ट्रेलिये वतीन व्हड अशी एकूय भागिदारी जाली ना.
भारता वतीन श्रेयांका पाटीलान तीन, पुजा वस्त्रकर आनी दिप्ती शर्मा हांकां दरेकी एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
