भांगरभूंय | प्रतिनिधी
आयज भारताच्या बायलांचो क्रिकेट पंगड श्रीलंके आडचे टी-20 माळेंतली दुसरी मॅच जिखून माळेंत 2-0 अशी निर्णायक आघाडी घेवपाक इत्सूक आसतलो. बिरेस्तारा जाल्ले पयले मॅचींत ताणें श्रीलंका पंगडाक 34 धांवड्यांनी हारयिल्लो.
भारताक आयचे मॅचींत बॅट्समनांक कडल्यान बऱ्या प्रदर्शनाची आस्त आसतली. तशेंच राष्ट्रकूल खेळां सर्ती पयलीं उणाव पयस करपाचो पंगड वेवस्थापनाचो यत्न आसतलो.
बर्मिघम राष्ट्रकूल खेळां सर्त 28 जुलय ते 8 ऑगस्ट मेरेन चलतली. ह्या खेळांत पयले खेपे बायलांचे टी-20 क्रिकेटीचो आस्पाव केला.
भारतान पयले मॅचींत पयली बॅटींग करतना फक्त 138 धांवड्यो केल्ल्यो. पूण, बॉलरांच्या उत्कृश्ठ प्रदर्शना नेटार भारताक जैत जोडपाक शक्य जाल्लें.
भारताच्या बॅट्समनांक आपल्या प्रदर्शनांत खूब सुदारणां करपाची गरज आसा. शेफाली वर्मा, मुखेली हरमनप्रीत कौर आनी ऋचा घोष हांकां बरे सुरवाती उपरांत व्हड स्कोर करचो पडटलो. हरमनप्रीत कौर फाटले मॅचींत अपेशी थारिल्ली. ताका लागून आदली मुखेली मिताली राजाचो विक्रम मोडपाक तिका जमूंक नाशिल्लो. मितालीन 89 टी-20 मॅचींनी खेळटना 2364 धांवड्यो केल्यात.
उप मुखेली स्मृती मंधाना आनी सभिनेनी मेघना हांकां लेगीत फाटले मॅचींत व्हड खेळी करपाक जमूंक नाशिल्ली. भारताक आयज व्हड स्कोर उबारपाक जाय जाल्यार स्मृती आनी मेघना हांकां बरी बॅटींग करची पडटली.
पयले मॅचींत भारतान 138 धांवड्यां मेरेन मजल मारप शक्य जाल्लें. हाचें स्रय जेमिमा रॉड्रिग्स आनी दिप्ती शर्मा हांकां वता. जेमिमान 27 बॉलांनी नाबाद 36 धांवड्यो केल्ल्यो, जाल्यार दिप्तीन आठ बॉलांनी नाबादा 17 धांवड्यांचें योगदान दिल्लें. वयले सुवाते वयल्या बॅट्समनां कडल्यान लेगीत अशाच प्रदर्शनाची आस्त पंगड वेवस्थापनाक आसतली.
दुसरे वटेन भारताच्या बॉलरांनी पयले मॅचींत उत्कृश्ठ प्रदर्शन केल्लें. राधान दोन जाल्यार दिप्ती आनी पार्टटायम बॉलर शेफाली हिणें दरेकी एक विकेट घेतिल्ली.
तिनूय मॅची एकाच मैदानाचेर जावपाच्यो आशिल्ल्यान दोनूय पंगडांचे स्पिनर म्हत्वाची भुमिका वठयतले.
श्रीलंकेक लेगीत आपल्या बॅट्समनां कडल्यान बऱ्या प्रदर्शनाची आस्त आसतली. पयले मॅचींत मदले फळयेंतली बॅट्समन कविशा दिलहारीन भारताच्या बॉलरांक बरे तरेन तोंड दिल्लें. पूण, दुसरे वटेच्यान ताका बरी साथ मेळूंक नाशिल्ली.
मुखेली चामरी अटापट्टू, विशमी गुणरत्ने, हर्षिता मडावी आनी निलाक्षी डी सिल्वा हांकां धांवड्यो करपाक चड जापसालदारकी घेवची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
