भांगरभूंय | प्रतिनिधी
भारताचो पंगड दरेक खेपे दक्षीण आफ्रिकेचे भुंयेर सदांच दुबळो थारला. आनी हे खेपे लेगीत ताचो प्रत्यय आयलो. हांगाच्या सुपर पार्क मैदानाचेर चालू आशिल्ले टॅस्टीच्या तिसऱ्याच दिसा भारत एक डाव आनी 32 धांवड्यांनी हारलो. भारताचो दुसरो डाव फकत 131 धांवड्यांचेर सोंपलो. विराट कोहलीन अर्द शेंकड्याची खेळी केली. ताका सोडलो जाल्यार हेर एकाय बॅट्समनाक खाशेलें प्रदर्शन करपाक जमलें ना. दक्षीण आफ्रिकेच्या नांद्रे बर्गरान चार विकेटी घेतल्यो.
भारतान पयल्या डावांत 245 धांवड्यो केल्ल्यो, ताका जाप दितना दक्षीण आफ्रिकेन आपल्या पयल्या डावांत 408 धांवड्यो केल्ल्यो. 163 धांवड्यांनी फाटीं आशिल्लो भारताचो दुसरो डाव 131चेर सोंपलो. हे हारी उपरांत दक्षीण आफ्रिकेंत टॅस्ट माळ जिखपाचें भारताचें सपन परतून भंगलें. माळेंतली दुसरी आनी निमाणी मॅच 3 जानेवारी सावन सुरू जातली. ही मॅच जिखून माळेंत बरोबरी करपाची संद भारता कडेन आसा.
पयल्या डावांत लोकेश राहुलान भारताचो डाव सांबाळपाचो यत्न केलो, जाल्यार दुसऱ्या डावांत कोहलीन एक बाजू सांबाळून धरली. पूण, ताका दुसरे वटेच्यान योग्य अशी साथ मेळूंक ना. येजमान पंगडान 163 धांवड्यांची आघाडी घेतल्या उपरांत भारता वयलें चेपण वाडिल्लें. कोहलीन अखेर मेरेन संघर्श केलो. पूण, ताका भारताची हार वाटावपाक जमली ना. भारताचो दुसरो डाव फकत 34.1 ओव्हरींनी सोंपलो.
रोहीत शर्माक पयल्या डावांत खाशेलें प्रदर्शन करपाक जमूंक नाशिल्लें. ताची भरपाय तो दुसऱ्या डावांत करतलो अशी ताच्या चाहत्यांक आस्त आशिल्ली. पूण, पयल्या डावा भशेन दुसऱ्या डावांतूय तो अपेशी थारलो. कगिसो रबाडान उत्कृश्ट बॉल घालून ताका बोल्ड केलो. रोहीता फाटोफाट यशस्वी जयस्वाल (5) लेगीत तंबूंत परतलो. ते उपरांत तंबूंत परतुपाची सर्त सुरू जाली.
मजगतीं, दक्षीण आफ्रिकेन काल 5 बाद 256 धांवड्यां वयल्यान मुखार खेळपाक सुरवात केली. ताच्या बॅट्समनांनी आक्रमक बॅटींग करून स्कोर 400 वयर पावयलो. ताणें 108.4 ओव्हरींनी सगल्यो विकेटी वगडावन 408 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
