भांगरभूंय | प्रतिनिधी
भारतीय क्रिकेट नियामक मंडळान (बीसीसीआय) 19 वर्सां पिराये सकयले आशियायी करंड सर्ती खातीर 15 वांगड्यांची घोशणा केली. पंजाबा वतीन खेळपी उदय सहारना कडेन मुखेलपद सोंपयलां. दुबय जावपी सर्तीक 8 डिसेंबरा सावन सुरवात जातली आनी 17 डिसेंबराक फायनल जातली. सर्तींत आठ पंगड वांटेकार जातले. सर्त 50 ओव्हर फॉर्मेटान जातली.
भारत 8 डिसेंबराक आपली पयली मॅच अफगाणिस्ताना आड खेळटलो. 10 डिसेंबराक पाकिस्ताना आड आनी 12 डिसेंबराक नेपाळा आड खेळटलो.
अण्डर 19 आशिया करंड सर्त निमाणे खेपे 2021त जाल्ली. फायनलींत भारतान श्रीलंकेक हारोवन वस्तादपण जोडिल्लें. फाटले खेपे लेगीत आठ पंगडांनीच वांटो घेतिल्लो. पूण, हे खेपे कुवेटा बदला जपानान पात्रताय मेळयल्या. जपान पयले खेपे हे सर्तींत खेळटा. आठ पंगडांक दोन गटांनी विभागल्यात. दोनूय गटांतले पयले दोन पंगड सेमी फायनलीक पात्र जातले. अण्डर 19 आशिया करंड सर्तींतलो भारत येसस्वी पंगड आसा. ताणें अजून मेरेन आठ खेपे वस्तादपण जोडलां.
भारताचो अण्डर 19 पंगडः उदय सहारन (मुखेली),अर्शिन कुलकर्णी, आदर्श सिंह, रुद्र पटेल, सचिन धस, प्रियांशू मोलिया, मुशीर खान, अरावेल्ली अवनीश राव, सौम्य कुमार, मुर्गन अभिषेक, इनेश महाजन, धनुष गौड, आराध्या शुक्ला, नमन तिवारी, राज लिंबानी.
स्टॅण्डबाय खेळगडे- प्रेम देवकर, अंश गोसाई, मोहम्मद अमान
रिझर्व्ह खेळगडेः दिग्विजय पाटील, जयंत गोयत, पी विग्नेश, किरण चोरमले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
