भांगरभूंय | प्रतिनिधी
भारताच्या बायलांच्या पंगडान ऑस्ट्रेलियेच्या बायलांच्या पंगडाक पयले टी-20 मॅचींत 9 विकेटींनी हारयलो. ह्या जैता सयत भारतान तीन मॅचींचे माळेंत 1-0 अशी आघाडी घेतली.
हांगाच्या डी व्हाय पाटील स्टेडियमाचेर भारतान टॉस जिखून पयलीं ऑस्ट्रेलियेच्या पंगडाक बॅटींग करपाचें आमंत्रण दिलें. ऑस्ट्रेलियेन 19.2 ओव्हरींनी सगल्यो विकेटी वगडावन 141 धांवड्यो केल्यो. 142 धांवड्यांचे मोखीचो फाटलाव भारतान 17.4 ओव्हरींनी फकत एक विकेट वगडावन केलो.
स्मृती मंधाना आनी शेफाली वर्मान अर्द शेंकड्यांची खेळी केली. दोगांयनी पयले विकेटी खातीर 137 धांवड्यांची भागिदारी करून भारताच्या जैताचें मुळावण घालें. ते पयलीं भारता वतीन तितास साधून 17 धांवड्यो दिवन 4 विकेटी घेतल्यो. तिच्या ह्या प्रदर्शनाक लागून तिची प्लेयर ऑफ द मॅच खातीर निवड जाली.
ऑस्ट्रेलियेची सुरवात सामकी बाबत जाली. 33 धांवड्यांचेर ताणें 4 विकेटी वगडायल्यो. एलिसा हिली 8 आनी बेथ मुनी 17 धांवड्यो करून बाद जाली. जाल्यार ताहलिया मॅक्ग्रा आनी एश्ले गार्डनर हांकां खातें लेगीत उगडपाक जमलें ना.
4 विकेटी रोखड्योच पडल्या उपरांत एलिस पेरी आनी फीब लीचफिल्ड हांणी पंगडाचो डाव सांबाळ्ळो. दोगांयनी अर्द शेंकड्याची भागिदारी करून पंगडाचो स्कोर 100च्या वयर पावयलो. लीचफिल्ड 49 धांवड्यो करून बाद जाली. दोगांयनी पांचवे विकेटी खातीर 79 धांवड्यांची भागिदारी केली. पेरी 37 धांवड्यो करून बाद जाली.
मदल्या ओव्हरींनी बशिल्ल्या धपक्यांतल्यान ऑस्ट्रेलियेक स्वता सांबाळपाक जमलें ना आनी ताचो डाव 19.2 ओव्हरींनी 141चेर सोंपलो.
भारताची 19 वर्सां पिरायेची फास्ट बॉलर तितास साधून फकत 17 धांवड्यो दिवन 4 विकेटी घेतल्यो. तिचे खेरीत श्रेयांका पाटील आनी दिप्ती शर्मा हांकां दरेकी 2 विकेटी फावो जाल्यो. रेणुका सिंग आनी अमनजोत कौर हांणी 1-1 विकेट मेळयली.
142चो फाटलाव करपी भारताक स्मृती आनी शेफाली हांणी उत्कृश्ट सुरवात करून दिली. दोगांयनी फकत स ओव्हरींनी स्कोर 59 मेरेन पावयलो. स्मृती 52 बॉलांनी 54 धांवड्यो करून बाद जाली. बाद जावचे पयलीं तिणें शेफाली वांगडा मेळून 137 धांवड्यांची भागिदारी केली.
स्मृती बाद जाली, त्या वेळार भारताक जैता खातीर फकत पांच धांवड्यांची गरज आशिल्ली. तिसरे सुवातेर बॅटिंगेक आयिल्ले जेमिमा रॉड्रिग्सा वांगडा मेळून शेफालीन 18वे ओव्हरींत जैत मेळोवन दिलें. शेफालीन 44 बॉलांनी नाबाद 64 धांवड्यो केल्यो. जेमिमान नाबाद 6 धांवड्यो केल्यो. ऑस्ट्रेलिये वतीन फकत जॉर्जिया वेयरहमान एक विकेट घेतली.
दुसरी टी-20 मॅच 7 जानेवारीक जातली. जाल्यार तिसरी मॅच 9 जानेवारीक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
