भांगरभूंय | प्रतिनिधी
येजमान भारतान चवथी टी-20 मॅच जिखून ऑस्ट्रेलिये आड चालू आशिल्ले माळेंत 3-1 अशी निर्णायक आघाडी घेतली. भारतान पयलीं बॅटींग करतना निर्धारीत 20 ओव्हरींनी 9 विकेटी वगडावन 174 धांवड्यो केल्यो. ते उपरांत ऑस्ट्रेलियेक 7 बाद 154 धांवड्यांचेर आडायलो. अशे तरेन भारतान 20 धांवड्यांनी जैत जोडलें.
दक्षीण आफ्रिकेचे भोंवडेर वचपाची संद मेळूंक नाशिल्ल्या अक्षर पटेलान तीन विकेटी घेवन जैतांत म्हत्वाची भुमिका वठयली. रवी बिश्नोईन परतून एकदा उत्कृश्ट बॉलींग घाली. ताणेंनूच ऑस्ट्रेलिये वयलें चेपण वाडयलें ताचो फायदो पुनरागमन करपी दीपक चाहरान घेतलो. ताणें दोन विकेटी मेळयल्यो.
ते पयलीं बॅटींग करपी भारताच्या यशस्वी जयस्वाल (37), ऋतुराज गायकवाड (32) हाणें बरी बॅटींग केली. पूण, मुखेली सुर्यकुमार यादव (1) आनी श्रेयस अय्यर (8) अपेशी थारले. रिंकू सिंगाक काल व्हड खेळी करपाची संद फावो जाली. ऋतुराज आनी रिंकू हाणें 31 बॉलांनी 48 धांवड्यांची खेळी केली. जितेश शर्मा आनी रिंकू हाणें पांचवे विकेटी खातीर 32 बॉलांनी 56 धांवड्यांची भागिदारी केली. जितेशान 19 बॉलांनी 3 सके आनी एक चवक्याचे मजतीन 35 धांवड्यो केल्यो. अक्षर पटेल शुन्याचेर बाद जालो. रिंकू 29 बॉलांनी चार चवके आनी तीन सक्यांचे मजतीन 46 धांवड्यो केल्यो.
ऑस्ट्रेलियेच्या बॉलरांनी येसस्वी रितीन कमबॅक केलें. ताणें निमाण्या पांच ओव्हरींनी 45 धांवड्यो दितना 5 विकेटी घेतल्यो. जेसन बेहरेनडॉर्फ आनी तनवीर हाणें दरेकी दोन विकेटी घेतल्यो. बेन डिवॉरशुईसान तीन विकेटी मेळयल्यो.
मोखीचो फाटलाव करपी ऑस्ट्रेलियेन आक्रमक सुरवात केली. जोश इंग्लीश आनी ट्रॅव्हिस हेड हाणें 3.1 ओव्हरींनी 40 धांवड्यो केल्यो. रवी बिश्नोईन ही भागिदारी फोडपाचें काम केलें. ताणें इंग्लीशाक (8) बोल्ड केलो. अक्षरान फुडले ओव्हरींत ट्रॅव्हिसाक तंबूची वाट दाखयली. ताणें 16 बॉलांनी 31 धांवड्यो केल्यो.
अक्षरान फुडले ओव्हरींत अॅरोन हार्डीक (8) बोल्ड केलो. ऑस्ट्रेलियेन पयल्या 10 ओव्हरींनी 3 विकेटी वगडावन 76 धांवड्यो केल्यो. फुडल्या 10 ओव्हरींनी तांकां 99 धांवड्यांची गरज आशिल्ली. अक्षरान आपल्या स्पेलाचे निमाणे ओव्हरींत ऑस्ट्रेलियेक आनीक एक धपको दिलो. ताणें बेनाक (19) बाद केलो. पुनरागमन करपी दीपक चाहरान भारताक व्हड येस मेळोवन दिलें. ताणें टीम डॅव्हिडाक (19) बाद केलो. निमाण्या 30 बॉलांनी 67 धांवड्यांची गरज आशिल्ली आनी ताच्या हातांत पांच विकेटी आशिल्ल्यो. पूण, ऑस्ट्रेलियेक ह्यो धांवड्यो करपाक शक्य जालें ना. पांचवी आनी निमाणी मॅच आयतारा बंगळुरूंत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
