भांगरभूंय | प्रतिनिधी
भारताच्या बायलांच्या क्रिकेट पंगडान तीन टी-20 मॅचींचे माळेंतले पयले मॅचींत येजमान श्रीलंका पंगडाक 34 धांवड्यांनी हारयलो. टॉस जिखून पयलीं बॅटींग करपी भारतान 20 ओव्हरींनी 6 विकेटी वगडावन 138 धांवड्यो केल्यो. जेमिमा रॉड्रिग्सान सगल्यांत चड 36 धांवड्यो केल्यो. मुखेली हरमनप्रीत कौरान 22 धांवड्यांचें योगदान दिलें.
मोखीचो फाटलाव करपी श्रीलंका पंगडान 20 ओव्हरींनी 5 विकेटी वगडावन 104 धांवड्यो केल्यो. कविशा दिलहारीन सगल्यांत चड 47 धांवड्यांचें योगदान दिलें. भारता वतीन राधा यादवान दोन विकेटी घेतल्यो. दीप्ति शर्मा, पुजा वस्त्रकर आनी शेफाली वर्मा हिणें दरेकी एक विकेट घेतली. माळेंतली दुसरी मॅच 25 जूनाक जातली.
भारताची सुरवात म्हणपा सारकी जावंक ना. 17 धांवड्यांचेर ताणें दोन विकेटी वगडायिल्ल्यो. स्टार बॅट्समन स्मृती मंधाना फक्त एक धांवडी करून तंबूंत गेलें. सभिनेनी मेघना शुन्याचेर बाद जाली. दोगांकूय ओशादी रानासिंघेन तंबूंत धाडलीं.
गरम वातावरण आनी दमट हवामानांत दोन विकेटी पडल्या उपरांत भारता वयलें चेपण स्पश्टपणान दिसतालें. अशे परिस्थितींत हरमनप्रीत आनी शेफाली वर्मा हे जोडयेन ही नाजूक परिस्थिती हाताळ्ळी. शेफालीन 31 धांवड्यांची खेळी केली.
पंगडांत पुनरागमन करपी जेमिमान भारताक सन्मानजनक धांवसंख्ये मेरेन व्हरपाची जापसालदारकी घेतली. पांचवे सुवातेर बॅटिंगेक आयिल्ले जेमिमान तीन चवके आनी एका सक्याच्या नेटार 36 धांवड्यो केल्यो.
मोखीचो फाटलाव करपी श्रीलंकेच्यो थारावीक अंतरान विकेटी पडत गेल्यो. शेफालीन दोन ओव्हरींनी 10 धांवड्यो दिवन दोन विकेटी घेतल्यो.
36 धांवड्यांची खेळी करपी जेमिमाची मॅन ऑफ द मॅच पुरस्कारा खातीर निवड केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
