भांगरभूंय | प्रतिनिधी
अरिजीत सिंग हुंदल हाचे हॅट्रिके नेटार भारतान काल दक्षीण कोरियाच्या पंगडाक 4-2 अशा गोल फरकांनी हारोवन दादल्यांचे संवसारीक ज्युनियर हॉकी सर्तीक जैतान सुरवात केली. अरिजीतान 11व्या, 16व्या आनी 41व्या मिनटाक गोल केलो. ताचे खेरीत अमनदीपान 30व्या मिनटाक गोल केलो.
दक्षीण कोरिया वतीन दोह्युन लिमान 38व्या मिनटाक आनी मिंकवोन किमान 45व्या मिनटाक गोल केलो. 2021त भुवनेश्वरांत खेळिल्ले संवसारीक करंड सर्तीचे कांश्या पदकाचे मॅचींत फ्रान्सा कडल्यान हारपी भारतान काल सुरवाती सावन आपलो शेक दवरलो. अरिजीतान पयल्या क्वॉर्टरांत पॅनल्टी कॉर्नरा वरवीं गोल करून भारताचें खातें उगडलें. ते उपरांत लेगीत भारतान आपलो शेक कायम राखलो.
अरिजीत आनी अमनदीप हाणें दुसऱ्या क्वॉर्टरांत मैदानी गोल केले. ताका लागून भारत मध्यांतरा मेरेन 3-0 असो मुखार आशिल्लो. तिसऱ्या क्वॉर्टरांत दक्षीण कोरियान मॅचींत येवपाचो यत्न केलो. लिम हाणें गोल करून कोरियाचें खातें उगडलें. पूण, अरिजीतान आपलो तिसरो आनी पंगडाचो चवथो गोल करून आपली हॅट्रीक पुर्ण केली. 4-1 अशी आघाडी घेतल्या उपरांत भारताचो खेळ विस्कळीत जालो. ताचो फायदो घेवन किमान गोल केलो.
भारत सी गटांतली आपली फुडली मॅच स्पेना आड खेळटलो. ह्या गटांतलो चवथो पंगड कॅनडाचो आसा. भारतान हाचे पयलीं 2001 आनी 2016त वस्तादपण जोडलां. जाल्यार 1997त उप वस्ताद थारिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
