भांगरभूंय | प्रतिनिधी
भारत आनी येजमान दक्षीण आफ्रिका ह्या पंगडां मदली केप टावन टॅस्ट मॅच फकत दोन दिसांनी सोंपली. भारतान 7 विकेटींनी जैत जोडून दोन टॅस्टींचे माळेंत 1-1 अशी बरोबरी सादली.
दोन दिसांनी मॅच सोंपपाची टॅस्ट क्रिकेटीच्या इतिहासांत ही 25वी खेप. टॅस्ट क्रिकेटीक 1877त सुरवात जाल्ली. तेन्ना सावन आतां मेरेन 2522 टॅस्टी जाल्यात. हातूंतल्यो फकत 25 मॅची दोन दिसां भितर सोंपल्यात. म्हणल्यार 0.99% टॅस्टीच इतले बेगीन सोंपल्यात.
भारतान दुसऱ्या डावांत आफ्रिकेन दिल्ली 79 धांवड्यांची मोख फकत 3 विकेटी वगडावन मेळयली. ओपनर यशस्वी जयस्वालान 28 आनी मुखेली रोहित शर्मान नाबाद 17 धांवड्यो केल्यो. मोहम्मद सिराज (6-15) आनी जसप्रीत बुमरा (6-61) हांणी वळेरेन पयल्या आनी दुसऱ्या डावांत जबरदस्त बॉलींग घालून जैताचें मुळावण घालें. केप टावनांत टॅस्ट जिखपी रोहित शर्मा आशिया खंडांतलो पयलो मुखेली थारलो.
दक्षीण आफ्रिकेचो पयलो डाव 55 धांवड्यांचेर गुठलायल्या उपरांत भारताक व्हड आघाडी घेवप डावान जैत जोडपाची संद आशिल्ली. पूण, रोहित शर्मा, शुभमन गिल आनी विराट कोहली हांकां सोडले जाल्यार हेरांक व्हड खेळी करपाक अपेस आयलें. भारताचो पयलो डाव 4 बाद 153 वयल्यान सगले बाद 153 असो गडगडलो आनी 98 धांवड्यांचे आघाडीचेर समाधान मानचें पडलें.
आफ्रिकेचो दुसरो डाव लेगीत गडगडलो. पूण, एडेन मार्करमान एक बाजू सांबाळून धरली. ताच्या 103 बॉलांनी 17 चवके आनी दोन सक्यांचे मजतीन 106 धांवड्यांचे खेळीन भारताक घाम काडलो. पूण, बुमरान 6 विकेटी घेत आफ्रिकेचो दुसरो डाव 176चेर सोंपयलो.
भारता मुखार जैता खातीर 79 धांवड्यांचें आव्हान आशिल्लें. 1882त ऑस्ट्रेलियेन 85 धांवड्यांची येसस्वी रितीन राखण केल्ली. इंग्लंडाचो डाव 77 धांवड्यांचेर गुठलावन ऑस्ट्रेलियेन 7 धांवड्यांनी जैत जोडिल्लें. हो विक्रम मोडपाची आफ्रिकेक संद आशिल्ली. पूण, पयल्या डावांत शुन्याचेर बाद जावपाचो राख यशस्वीन दुसऱ्या डावांत काडलो. ताणें आफ्रिकेच्या बॉलरांक बरे तरेन तोंड दिलें. ताणें 23 बॉलांनी 28 धांवड्यो केल्यो. ताणें रोहिता वांगडा मेळून 44 धांवड्यांची भागिदारी केली. नांद्रे बर्गरान ताका बाद केलो. कगिसो रबाडान दुसरो धपको दितना शुभमन गिलाक (10) बोल्ड केलो. विराट कोहली (12) जैता खातीर चार धांवड्यो आसतना मार्को यानसेनच्या बॉलाचेर बाद जालो.
भारतान 12 ओव्हरींनी 3 विकेटी वगडावन 80 धांवड्यो करून जैत जोडलें. रोहित 17 धांवड्यांचेर नाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
