भारताक पांच विकेटींनी जैत

भांगरभूंय | प्रतिनिधी

येजमान भारतान ऑस्ट्रेलिया पंगडाक वन डे माळेंतले पयले मॅचींत 5 विकेटींनी हारयलो. भारतान 11 वर्सांनी हांगाच्या वानखेडे स्टेडियमाचेर वन डे मॅचींत जैत जोडलें. ह्या जैता सयत भारतान तीन मॅचींचे माळेंत 1-0 अशी आघाडी घेतली.

टॉस हारल्या उपरांत पयलीं बॅटींग करपी ऑस्ट्रेलियेन 35.4 ओव्हरींनी सगल्यो विकेटी वगडावन 188 धांवड्यो केल्यो. भारतान 39.5 ओव्हरींनी 5 विकेटी वगडावन मोख मेळयली. ह्या जैतांत लोकेश राहुलान वन डे क्रिकेटींतलो 13वो अर्द शेंकडो पुर्ण केलो, जाल्यार रवींद्र जडेजा वांगडा सवे विकेटी खातीर नाबाद 104 धांवड्यांची भागिदारी केली.

फाटल्या कांय मॅचींनी फॉर्मा खातीर झुजपी लोकेश राहुल काल लयेंत दिसलो. ताणें 91 बॉलांनी 75 धांवड्यांची नाबाद खेळी केली. ताचे खेरीत जडेजान 45 धांवड्यो करून नाबाद रावलो.

ते आदीं, टॉस हारल्या उपरांत पयलीं बॅटींग करपी ऑस्ट्रेलियेची सुरवात सामकी बाबत जाली. ट्रॅव्हिस हेडान फकत पांच धांवड्यांचेर बाद जालो. ते उपरांत मिचेल मार्श आनी मुखेली स्टिवन स्मिथ हांणी 72 धांवड्यांची भागिदारी केली.

पूण, हार्दिक पांड्यान स्मिथाक बाद करून ऑस्ट्रेलियेक व्हड धपको बसलो. तिसरे विकेटी खातीर मार्नस लाबशेना वांगडा मार्शान 52 धांवड्यांची भागिदारी केली. जडेजान ताका 81 धांवड्यांचेर बाद केलो. ताणें हे मजगतीं, 65 बॉलांनी 10 चवके आनी पांच सके मारले.

मिशेल मार्श बाद जाल्या उपरांत पुर्ण ऑस्ट्रेलियेचो डाव गडगडलो. मोहम्मद शमीन तीन ओव्हरींनी तीन विकेटी घेतल्यो. ते उपरांत जडेजान मॅक्सवॅलाक बाद केलो. मॅक्सवॅलाक फकत आठ धांवड्यो केल्यो. अखेरेक मोहम्मद सिराजान शॉन अॅबॉट आनी अॅडम झम्पा हांकां बाद करून ऑस्ट्रेलियेचो डाव 188चेर सोंपयलो. शमी आनी सिराज हांणी तीन, जडेजान दोन विकेटी घेतल्यो. हार्दिक आनी कुलदीप यादव हांणी एक विकेट घेतली.

वानखेडे स्टेडियमाचेर भारतान अखेरेची मॅच ऑक्टोबर 2011त इंग्लंडा आड जैत जोडिल्लें. ते उपरांत भारत ह्या मैदानाचेर तीन मॅची खेळिल्लो आनी तिनूय मॅचींनी हार घेवची पडिल्ली. 2015त दक्षीण आफ्रिकेन 214 धांवड्यांनी, 2017त न्युझिलॅण्डान 6 विकेटींनी आनी 2020त ऑस्ट्रेलियेन 10 विकेटींनी हारयिल्लो.

मजगतीं, मोखीचो फाटलाव करतना भारताचो टॉप ऑर्डर फ्लॉप थारलो. पंगडान सुरवातीच्यो तीन विकेटी फकत 16 धांवड्यांचेर वगडायिल्ल्यो. भारताक पयलो धपको पांच धांवड्यांचेर बसलो. इशान किशन तीन धांवड्यो करून बाद जालो. ते उपरांत 16 धांवड्यांचेर विराट कोहली (4) बाद जालो. आनी त्याच धांवड्यांचेर तिसरो धपको बसलो. सुर्यकुमार यादव शुन्याचेर बाद जालो.

मदले फळयेंत शुभमन गिलान 20 आनी मुखेली हार्दिक पांड्यान 25 धांवड्यो केल्यो.